Имрӯз дар Донишкадаи тарбияи ҷисмонии Тоҷикистон ба номи С.Раҳимов бахшида ба 30-солагии Конститутсияи Ҷумҳурии Тоҷикистон конфронси илмӣ - назариявӣ дар мавзӯи “Конститутсия-бахтномаи милат, калиди маърифат дар татбиқи рушд ва оммавияти варзиш” баргузор гардид.

Дар конфронси мазкур Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Муҳаммадшо Абдуллозода, ректори Донишкадаи тарбияи ҷисмонии Тоҷикистон ба номи С.Раҳимов, варзишгарон, ҷавонон ва дигар намояндагони идораву вазоратҳо иштирок ва суханронӣ намуданд.

Нахуст Зулфиқор Гулаҳмадзода иштирокчиёни конфронсро ба ин саҳнаи муборак шодбош гуфта, иброз намуд, ки қабули Конститутсия дар шароити мураккаби сиёсӣ дастоварди беназири хали тоҷик аст.

- 30 сол муқадам бо роҳи раъйпурсии умумихалқӣ қабул шудани Конститутсия нишонаи ҳисси баланди масъулияти шаҳрвандони мо нисбат ба ояндаи худ, тақдири минбаъдаи давлат ва ифодаи руҳияи ватандӯстиву худшиносии мардум мебошад. Пас ҷавонону варзишгарони моро мебояд, то ба арзишу меъёрҳои Конститутсия арҷ гузорем ва барои пос доштони он ҳамеша дар набард бошем,- илова кард, раиси Кумита.

Сипас, Абдуллозода Муҳаммадшо ҳамаи даъватшудагонро ба донишкада хайрумақдам намуда, иброз дошт, ки “Дар натиҷаи ба даст овардани Истиқлолияти давлатӣ ва қабул гардидани Конститусия соҳаи тарбияи ҷисмонӣ ва варзиш дар маркази таваҷҷуҳи бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон қарор гирифту варзиш ба яке аз самтҳои афзалиятноки сиёсати Ҳукумати мамлакат пазируфта шуд. Қайд кардан ба маврид аст, ки тинҷию оромӣ аст, ки сол то сол дастовардҳои варзишгарону мураббиёни тоҷик афзуда, мо бо ифтихор мегӯем, ки варзишгарони тоҷик на танҳо пешбарандаи соҳа, балки муаррифгари давлат ва парчамбардору ифтихори миллати тоҷик ҳастанд.”

Дар идомаи конфронс аз ҷониби дигар иштирокчиён перомуни паҳлуҳои гуногуни Конститутсия маърӯзаҳо карда, дар фарҷом ба як қатор омӯзгорон ва иштирокчиён сипоснома ва тӯҳфаҳои хотирвӣ тақдим гардид.

Наҷиба МУРОДБЕКОВА, “ҶТ”