Дар вилояти Хатлон равобити муштараки дӯстонаи Ҷумҳурии Тоҷикистону Туркия дар соҳаҳои фарҳанг, илм, маориф, тандурустӣ ва сайёҳии баррасӣ гардид.

Дар ин бора Хадамоти матбуоти раиси вилояти Хатлон иттилоъ медиҳад.

Манбаъ иттилоъ медиҳад, ки мулоқоти раиси вилояти Хатлон Давлаталӣ Саид бо Ибраҳим Этҳем Унал - намояндаи Агентии Туркия оид ба ҳамкорӣ ва ҳамоҳангсозӣ (ТИКА) дар Тоҷикистон сурат гирифтааст.

- Зимни мулоқот ба муштаракоти фарҳангию равобити дерини дӯстонаи Тоҷикистону Туркия таъкид шуда, қайд гардид, ки ин ҳамкориҳои иқтисодию фарҳангӣ сол аз сол вусъат меёбанд,-омадааст дар хабар.

Раиси вилояти Хатлон Давлаталӣ Саид зимни мулоқот аз такони тозае дар таҳкими муносибатҳои дуҷонибаи вилояти Хатлон ва Агентии Туркия оид ба ҳамкорӣ ва ҳамоҳангсозӣ (ТИКА) дар Тоҷикистон гуфта, зикр намуд, ки Ҷумҳурии Тоҷикистон бо Ҷумҳурии Туркия муносибатҳои гарму дӯстона дорад, ки дар асоси принсипҳои эҳтироми якдигар, эътимод, ҳамдигарфаҳмӣ ва ба назар гирифтани манфиатҳои тарафайн бунёд шудаанд.

- Вилояти Хатлон бо назардошти дастуру ҳидоят ва тавсияҳои Пешвои миллат саъю кӯшиш дорад, ки ҳамкориҳои мутақобилан судмандро дар бахшҳои мухталифи иқтисодиву иҷтимоӣ бо минтақаҳои Туркия таҳким бахшад, - афзуд раиси вилоят.

Раиси вилояти Хатлон зикр намуд, ки бо дарназардошти муштаракоти таърихӣ ва фарҳангӣ мо бар он бовар ҳастем, ки ду кишвари дӯсту бародар барои рушди минбаъдаи ҳамкориҳо дар соҳаҳои фарҳанг, илм, маориф, тандурустӣ ва сайёҳӣ заминаҳои муносиб доранд.

Инчунин, дар мулоқот ҷонибҳо масоили рушди соҳаи қолинбофӣ, таъсиси корхонаи барориши атласу адрас, маркази омӯзишӣ барои рушди ҳунарҳои мардумӣ, рушди соҳаи пиллапарварӣ, соҳаи нассоҷӣ, коркарди пӯсту пашм, таъсиси корхонаи хушкмева, обёрӣ, мубориза бар зидди малах, маориф ва тандурустиро мавриди баррасӣ қарор доданд.