Бо рушди илму техникаи асри ХХI метавон иттилоъро дар як лаҳза интишор дод ва дар ҳамон лаҳза мутолиа намуд. Аз ин рӯ, ҳар гуна воқеаву ҳодиса дар расонаҳои гуногун баробар паҳн мешавад. Вале расонаҳо воқеаву ҳодисаҳоро аз дидгоҳи худ шарҳ медиҳанд. Дар иттилоъ манфиати шахсӣ, гурӯҳӣ, ақидаи роҳбарикунанда, андешаи муаллиф ва ноширро низ зикр мекунанд. Баъзе қувваҳои тахрибкор хабарро танҳо ба хотири манфиатҷӯӣ пахш мекунанд ва ба иттилои сӯзанда бештар диққат медиҳанд. Чунки он барои тахрибкорӣ истифода шуда, ҷомеаро аз раванди табиии пешрафташ берун мекашад.

Маҳз иттилои тасаввури манфиро бавуҷудоваранда дар сомонаи аъзои Ҳизби мамнӯи наҳзати исломӣ бо номи «паём.нет» пайдо мешавад. Ин гурӯҳ умри худро сарфи сафсатаи авомфиребона ва мунофиқона намуда, ки аз виҷдони поку ғурури ҷавонмардӣ дар вуҷудашон чизе намондааст. Сари андешаи хом бо интишори матлаби бадномкунанда таҳти унвони «Ҳукумат ваъдаашро хилоф кард, андози роҳ лағв нашуд» дар расонаҳои иттилоотии зери назари худ доду вой доранд, ки аз байн бурдани ситонидани андоз аз истифодабарандагони роҳ то 1-уми январи соли 2018 ба таъхир гузошта шуд.

Ин иддаокунандаҳо аз пеши пои худ қадами фарозтарро надидаанд, чунки кутоҳназаранд. Онҳо барои «паём.нет» «пуштибонанд» ва ҳам пайравони ин ҳизбанд, сари ҳар зӯромаде дари созмону ташкилотеро мекӯбанду хоки пояшонро ба дидаҳо молида, ба умеди «маслиҳат»-и аҷнабиён ба ин ватан душманӣ мекунанд. Ин танҳо иғвогариву мунофиқӣ аст. Чунки Ҳизби мамнӯи наҳзати исломӣ, ки дар Тоҷикистон ҳамчун ташкилоти террористӣ ва экстримистӣ шинохта шудаву фаъолияташ қатъ гардидааст, наметавонад аз номи мардуми Тоҷикистон сухан бигӯяд. Лекин бо ду-се гумроҳ дар утоқҳои корӣ нишаста, тарҳи низои наве барои ин сарзамин мекашанд. Гоҳо агар дар ин ё он гӯшаи дунё авзоъ ташаннуҷ ёбад, аввалин шуда ТЭТ ҲНИТ табли шодӣ мезанад.

Бояд тазаккур дод, дунё бар пояи адлу инсоф пойдор аст. Аҳли наҳзат аз адлу инсоф дуранд ва бо ин ибора ду чизи муқобиланд. Онҳо ба сухани муовини вазири молияи Тоҷикистон Умед Латипов, ки рӯзи 1-уми декабр дар ҷаласаи парлумон садо дода буд, тибқи муқаррароти қаблӣ андоз аз истифодабарандагони роҳ бояд аз 1-уми январи соли 2017 лағв мегардид, аммо дар шароити буҳронӣ агар ин намуди андоз бекор гардад, ба буҷаи давлат 360 миллион сомонӣ ворид намешавад, эрод гирифтанд. Бо интиқоди авомфиребона, аъмоли разилонаи худро пинҳон кардан мехоҳанд ва дар ситоиши наҳзатиҳои гуреза қиссаҳо меофаранд, вале намедонанд, ки ҷараёни ҷомеа чунинҳоро мисли хасрӯба ба соҳил афканда, дигар барои дар фазои озоду солим шино намудан, имкон намедиҳад, магар ба ҷуз пӯсида несту нобуд шудан. Аз ин рӯ, ягон кори дунё ба муроди дили фирориён набудаву намешавад. Замоне бо ҳамин гуна иғвоангезӣ ҷанги шаҳрвандиро бо истифода аз вазъи бесомонии мамлакат сар кардаву ба кишвари ҷангзадаи Афғонистон фирор намуда буданд. Ҳоло бошад, овораи кишварҳои аврупоӣ гардидаанд.

Парда аз рӯи риёкорон бардошта шуд ва ҷилваи минбарии ТЭТ ҲНИТ сар омад. Ба мардум фатвои мувофиқи нафси худ медоданд, то пайрави онҳо бошанд. Аммо хориҷшавии фавҷ-фавҷи мардум аз ҳизби козибро таҳаммул накарданду сар пайи аҷнабиён заданд. Дигар на аз дохил ва на аз хориҷ обрӯе нахоҳанд ёфт, чунки умедҳо бар боди фано рафт.

Рустам РАҲИМОВ