СИЁСАТ
Сешанбе 27 Сентябр 2022 04:56
1650
Дар рӯзи сеюми сафари корӣ ба шаҳру ноҳияҳои минтақаи Кӯлоби вилояти Хатлон Пешвои миллат, Президенти ҷумҳурӣ, муҳтарам Эмомалӣ Раҳмон дар маҳалаи Ориёнои шаҳри Кӯлоб бо гузоштани санги асос ва нома ба наслҳои оянда ба сохтмони бинои маъмурию таълимӣ, озмоишгоҳи таълимию илмӣ ва хобгоҳи Донишкадаи технология ва менеҷменти инноватсионӣ расман оғоз бахшид.



Шаҳраки маъмурию таълимӣ ва истиқоматии Донишкадаи технологӣ ва менеҷменти инноватсионӣ дар шаҳри Кӯлоб бо дастгириҳои бевоситаи Президенти ҷумҳурӣ аз ҷониби Дирексияи иншооти ҳукуматии Дастгоҳи иҷроияи Президенти Ҷумҳурии Тоҷикистон бунёд мегардад. Айни замон лоиҳаи ангоравии иншооти мазкур тасдиқ шуда, соли 2017 барои сохтмони бинои маъмурию таълимии 11-ошёна, озмоишгоҳи таълимию илмӣ ва хобгоҳи донишкада 13 миллион сомонӣ пешбинӣ гардидааст. Мувофиқи дурнамо дар биноҳои нав барои ба таълим фаро гирифтани 3000 донишҷӯ шароит фароҳам оварда шуда, ҳамчунин хобгоҳи дорои шароити муосир бунёд мегардад, ки барои 600 нафар пешбинӣ шудааст. Дар ин мавзеъ, ҳамчунин бинои истиқоматии 9-ошёна барои омӯзгорон, толорҳои бузурги маҷлис ва варзишӣ, боғ ва майдонҳои истироҳатию бозиҳои гуногуни варзишӣ сохта мешавад.



Дар маҳаллаи Ориёнои шаҳр Сарвари давлат, ҳамчунин бо гузоштани санги асос ва нома ба наслҳои оянда ба корҳои сохтмони бино ва иншооти қисми минтақавии Раёсати Вазорати корҳои дохилии Ҷумҳурии Тоҷикистон оғози расмӣ бахшид. Иттилоъ дода шуд, ки арзиши лоиҳавии он 5 миллиону 600 ҳазор сомониро ташкил дода, анҷоми корҳои сохтмонӣ соли 2017 пешбинӣ шудааст. Бино аз 9 ошёна ва таҳхонаи дорои 52 утоқи корӣ, ошхона барои 60 нафар, толори варзишӣ, маҷлисгоҳ бо 125 ҷойи нишаст, қисми навбатдорӣ ва дигар иншооти ёрирасон иборат хоҳад буд.



Имрӯз Пешвои миллат, муҳтарам Эмомалӣ Раҳмон, инчунин дар хиёбони Исмоили Сомонии шаҳри Кӯлоб ба бунёди як меҳмонхонаи муосири баландошёна  санги асос гузошт. Он аз дувоздаҳ ошёна ва таҳхона  иборат буда, ошёнаи аввал барои бунёди Маркази маданияти кӯдакону наврасон, Маркази зебоӣ, толори фӯруши маҳсулотҳои дастӣ аз қабили чакану  зардӯзӣ ва дигар марказҳои савдою тарабхона пешбинӣ шудааст.

Тавре иттилоъ дода шуд, дар  Маркази маданияти кӯдакону наврасон синфхона ва толорҳои махсус барои омӯзишу азхуднамоии рақсҳои кӯдаконаи балет, гимнастика, ҳайкалтарошӣ ва рассомӣ ташкил карда мешавад. Маркази зебоӣ аз толори мӯд ва студияи тарроҳон иборат хоҳад буд.

Мувофиқи лоиҳа аз ошёнаи  3 то ошёнаи 11  барои меҳмонон ва сайёҳони хориҷӣ  402 ҳуҷра барои қабули то 500 меҳмон бо намунаи санъати меъмории миллӣ ва шароиту имконоти замонавӣ сохта мешавад. Ошёнаи 12 толорҳои истироҳату фароғат, машқи бадан ва толори бузург барои маҷлису конфронсҳо хоҳад буд.



Сипас, Роҳбари давлат дар хиёбони Исмоили Сомонӣ дар расми ифтитоҳи Маҷмааи Нишон ва Парчами давлатии Ҷумҳурии Тоҷикистон иштирок намуд. Сарвари давлат дар вазъияти тантанавӣ парда аз рӯйи лавҳаи мармарини Нишони давлатии Ҷумҳурии Тоҷикистон бардошт, ки бо санъати меъмории нотакрор бунёд шудааст. Нишони давлатии Ҷумҳурии Тоҷикистон дар хиёбони марказии шаҳр қомат афрохта, дар пояи аз метали махсус омодашуда насб гардидааст, ки баландии поя бо фарогирии нишон дар маҷмуъ 27,7 метрро ташкил медиҳад. Аз ин андоза 5 метр таҳкурсии Нишони давлатӣ мебошад,ки бо мармари холис рӯйпуш карда шудааст. Рамзи Нишони давлатӣ аз ҷониби ходимони Корхонаи рассомӣ-ҳайкалтарошии ҶДММ "Нури Шамс"-шаҳри Кӯлоб таҳия ва сохта шуда, бо рангу ҷилои махсус оро ёфтааст. Фармоишгар ва маблағгузори иншоот Мақомоти иҷроияи маҳаллии ҳокимияти давлатӣ дар шаҳри Кӯлоб мебошад. Пояи асосӣ ва таҳкурсию сутунҳои даромадгоҳи майдони Нишони давлатӣ аз ҷониби ҶДММ "Фаридун" сохта шудааст.

Сипас, Президенти мамлакат ба маҳалли Парчами давлатии Ҷумҳурии Тоҷикистон ташриф овард, ки дар ҳамин мавзеъ ҷойгир шудааст. Истиқболи Сарвари давлат, муҳтарам Эмомалӣ Раҳмон дар назди иншооти навбунёд самимӣ ва ба таври хоса доир гардида, дар як вақт бо расми истиқбол матои Парчами давлатӣ аз ҷониби сарбозони Горди миллӣ зери навои мутантан ба майдон оварда шуд ва Суруди миллии Ҷумҳурии Тоҷикистон аз ҷониби толибилмони муассисаҳои таҳсилоти миёнаи шаҳри Кӯлоб ба таври зинда иҷро гардид.

Президенти ҷумҳурӣ баъди буридани лентаи рамзӣ, пардабардорӣ аз рӯйи лавҳаи мармарин бо навиштаҷоти Парчами давлатии Ҷумҳурии Тоҷикистон ва барафроштани парчам дар пояи баландиаш 52,5 метр ин рӯйдодро дар шаҳри Кӯлоб, аз ҷумлаи воқеаҳои муҳими таърихӣ дар давоми 25 соли Истиқлолияти давлатии Ҷумҳурии Тоҷикистон арзёбӣ кард.

Парчами давлатӣ дар шаҳри Кӯлоб дар доираи татбиқи нақшаи чорабиниҳои таҷлили ҷашни 25-солагии Истиқлолияти давлатии Ҷумҳурии Тоҷикистон бо фармоиш ва маблағгузории ҶСК "Ориёнбонк" бунёд гардида, аз матои андозаи 14х7 метр омода ва дар пояи аз метали махсус сохташуда насб гардидааст. Пояи асосии парчам дар назди панҷ сутуни мармарини бузург ҷойгир аст, ки шакли меъмории қадимиро таҷассум менамоянд. Таҳкурсии пояи Парчами миллӣ низ рӯйпуш бо мармар буда, 2 метр баландӣ дорад ва дар шакли ду чоркунҷаи руйи ҳам бунёд шудааст. Аз ду канори даромадгоҳи асосии майдони Парчами давлатӣ бо намои санъати волои меъморӣ ду муҷассамаи шерони болдор қомат афрохтааст, ки рамзи шоҳони Хатлонзаминро таҷассум менамоянд. Баландии муҷассамаҳои шерони болдор бо таҳсутунҳо 3 метрро ташкил медиҳанд. Муҷассамаҳои шерони болдор аз ҷониби Аълочии фарҳанги Тоҷикистон ва узви Иттифоқи рассомон Шамсиддин Одинамадов эҷод ва бо маҳорати хоса оро дода шудааст.

Президенти мамлакат баробари ифтитоҳи иншооти мазкур, таъкид дошт, ки дар як рӯз дар маркази шаҳри Кӯлоб якбора қомат афрохтани намунаи ду муқаддасоти миллӣ нишони олии гиромидошт ва арҷгузорӣ ба арзишҳои волои давлатдорӣ буда, барои боз ҳам баланд бардоштани ҳувияти миллӣ ва ҳисси ватандӯстию ватанпарастии насли ҷавон ва дар маҷмуъ кулли сокинони шаҳри Кӯлоб нақши муҳим мегузорад.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

Сентябр 2022 c.