Дар идомаи сафар ба кишварҳои Аврупо Пешвои миллат, Президенти кишвар Эмомалӣ Раҳмон дар шаҳри Прага бо Президенти Ҷумҳурии Чех Милош Земан мулоқот кард.

Баррасии масоили рушду густариши ҳамкорӣ ва дурнамои муносибатҳои Тоҷикистону Ҷумҳурии Чех дар мулоқоти хосаи сарони давлатҳо оғоз гардида, сипас дар музокироти сатҳи баланд бо иштироки ҳайатҳои расмӣ идома ёфт.

Дар суҳбат Президенти ҷумҳурӣ, муҳтарам Эмомалӣ Раҳмон изҳор дошт, ки муносибатҳои Тоҷикистон бо Ҷумҳурии Чех ҳамчун шарики боэътимод дар арсаи байналмилалӣ ва ҳалқаи пайвандгари Тоҷикистон бо Аврупо аз афзалиятҳои сиёсати хориҷӣ ба шумор рафта ҷониби Тоҷикистон ба дурнамои бобарори робитаҳои байнидавлатӣ, ки пояи ҳуқуқии онро 8 санади ҳамкорӣ ташкил медиҳад, эътимоди комил дорад.

Таъкид гардид, ки наздикию мувофиқати мавқеъ ва нақши давлатҳо дар масъалаҳои калидии байналмилалӣ пояи боэътимоди тавсеаи ҳамкориҳо дар тамоми арсаҳои мавриди таваҷҷуҳи тарафайн мебошанд.

Ҳар ду ҷониб таъсиси Гурӯҳи доимии байнисоҳавии Тоҷикистону Чех оид ба масъалаҳои ҳамкории иқтисодӣ ва саноатиро дар таърихи робитаҳои байнидавлатӣ иқдоми муҳиму саривақтӣ арзёбӣ карда, аз имконияту иқтидорҳои истифоданашудаи зиёд дар муомилоти тиҷоративу иқтисодии ду кишвар ёдовар шуданд.

Таъсиси корхонаҳои муштараки коркарди маъданҳои кӯҳӣ, сангу металлҳои қиматбаҳо, маҳсулоти кишоварзӣ, таъсиси корхонаҳо дар соҳаҳои саноати хурокворӣ ва истеҳсоли маводи рӯзғор аз алюминий, соҳаҳои фармасевтика, коммуникатсия ва сохтмони сардхонаву гармхонаҳо аз лоиҳаҳои манфиатовари Тоҷикистон арзёбӣ шуданд, ки доираи тоҷирону соҳибкорони Ҷумҳурии Чех метавонанд дар татбиқи онҳо фаъолона иштирок намоянд.

Ҳамчунин, барои тавсеаи бештари ҳамкориҳо дар соҳаи гидроэнергетика, аз ҷумла иштирок дар татбиқи лоиҳаҳои сохтмони хатҳои интиқоли барқ ва бунёди неругоҳҳои хурду миёна дар Ҷумҳурии Тоҷикистон фикру мулоҳизаҳои судманд баён карда шуд.

Ҷалби технологияҳои муосири Чех барои бунёди корхонаҳои хурду бузурги саноатӣ дар минтақаҳои озоди иқтисодии Тоҷикистон ва ба роҳ мондани истеҳсоли маҳсулоти рақобатпазири дар бозорҳои Осиёи Марказию Ҷанубӣ харидор дошта аз воситаву имкониятҳои нави ҳамкории доираи тоҷирону соҳибкорони Ҷумҳурии Тоҷикистон ва Ҷумҳурии Чех арзёбӣ гардид.

Барои тақвияти бештари муносибатҳои фарҳангию гуманитарӣ ва рушди бемайлони ҳамкорӣ дар соҳаи туризм, аз ҷумла туризми табобативу кӯҳнавардӣ ҳавасмандии зиёд зоҳир карда шуд.

Дар соҳаи маориф муҳимияти ҳамкории байнидавлатии Тоҷикистон ва Чех дар самти табодули таҷрибаи устодону донишҷӯёни ҳар ду кишвар, ба таҳсил фаро гирифтани донишҷӯёни Тоҷикистон дар донишгоҳҳои Чех дар доираи барномаҳои таҳсилотии Иттиҳоди Аврупо, ба мисли Темпус, Эразмус Мундус, Эразмус плюс ва ҷудо намудани теъдоди бештари квотаҳо барои таҳсили толибилмони тоҷик дар донишгоҳҳои Чехия таъкид гардид.

Дар музокироти сатҳи баланд ҳамчунин доир ба рушди ҳамкориҳои минтақавию байналмилалӣ мароқ зоҳир гардида, барои муборизаи муштарак ба муқобили терроризми байналхалқӣ, экстремизм, гардиши ғайриқонунии маводи нашъаовар ва дигар шаклҳои ҷинояткории муташаккилона, ҳамзамон иштироки фаъол дар таъмини амнияти суботи Афғонистон изҳори омодагию ҳавасмандӣ карда шуд.

Мулоқоту музокироти сатҳи баланди имрӯза идомаи муколамаи мунтазами сиёсӣ ва натиҷаи равобити бобарори ду давлат арзёбӣ гардид ва изҳори итминон карда шуд, ки натиҷаҳои сафари расмии роҳбарияти сатҳи олии Тоҷикистон ба Ҷумҳурии Чех боз як қадами муҳиму боварибахш дар рушди муносибатҳои муосири дуҷониба хоҳад шуд.

Баъди анҷоми мулоқоту музокироти сатҳи олӣ миёни ду кишвар 2 санади нави ҳамкорӣ ба имзо расид. Нахуст сарони давлатҳо Изҳороти муштараки миёни Ҷумҳурии Тоҷикистон ва Ҷумҳурии Чех оид ба таҳкими ҳамкориҳоро қабул карданд. Сипас дар ҳузури сарони давлатҳо Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Чех оид ба алоқаи ҳавоӣ ба имзо расид.

Ҳамчунин дар доираи сафари расмии Президенти Ҷумҳурии Тоҷикистон дар Ҷумҳурии Чех Ёддошти тафоҳум оид ба ҳамкорӣ байни Прокуратураи генералии Ҷумҳурии Тоҷикистон ва Прокуратураи генералии Ҷумҳурии Чех аз ҷониби прокуророни генералии ҳар ду кишвар имзо карда шуд.

Интизор меравад, ки баъди анҷоми кори Форуми соҳибкорон ва сармоягузорони Тоҷикистон ва Чех боз ду санади нав - Ёддошти тафоҳум оид ба ҳамкорӣ миёни Палатаи савдо ва саноати Ҷумҳурии Тоҷикистон ва Конфедератсияи саноатчиёни Ҷумҳурии Чех ва Ёддошти тафоҳум оид ба ҳамкорӣ миёни Китобхонаи миллии Ҷумҳурии Тоҷикистон ва Китобхонаи миллии Ҷумҳурии Чех ба имзо расад.