Ба ҳолати 13 майи соли 2024 дар вилояти Хатлон нақшаи иҷрои даъвати баҳории шаҳрвандон ба сафи Қувваҳои Мусаллаҳи Ҷумҳурии Тоҷикистон 97 фоиз иҷро гаридидааст.

Дар ин бора маркази матбуоти раиси вилояти Хатлон иттилоъ дода, гуфтааст, ки дар рӯзи аввал нақшаи даъвати баҳорӣ дар ноҳияҳои Вахш, Фархор, Муъминобод, Хуросон 100 фоиз иҷро гирдид.

Сипас, шаҳру ноҳияи Носири Хусрав, Норак, Левакант, Дӯстӣ, Қубодиён, Панҷ, Бохтар, Кӯшониён, Шаҳритус, Ҷайҳун, Балҷувон, Ҷалолиддини Балхӣ, Ёвон ва Данғара низ нақшаи даъвати баҳориро 100 фоиз иҷро намуданд. То имрӯз 18 шаҳру ноҳия нақшаи даъвати баҳориро иҷро намуданд.

Бояд гуфт, ки тибқи Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006 Ҷумҳурии Тоҷикистон ба хизмати ҳарбӣ”, аз 5 марти соли 2024, №791, моҳҳои апрел-майи соли 2024 шаҳрвандони ҷинси марди то рӯзи даъват ба синни 18 расида, инчунин шаҳрвандони синни калонтари Ҷумҳурии Тоҷикистон, ки ҳуқуқи ба таъхир андохтани муҳлати даъват ё озод будан аз даъват ба хизмати ҳарбиро надоранд, барои хизмат ба сафи Қувваҳои Мусаллаҳи Ҷумҳурии Тоҷикистон, қӯшунҳои сарҳадии Кумитаи давлатии амнияти миллии Ҷумҳурии Тоҷикистон, Гвардияи миллии Ҷумҳурии Тоҷикистон, қӯшунҳои дохилии Вазорати корҳои дохилии Ҷумҳурии Тоҷикистон, қӯшунҳои мудофиаи граждании Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, бригадаи посбоникунандаи сарраёсати иҷрои ҷазои ҷиноятии Вазорати адлияи Ҷумҳурии Тоҷикистон, баталиони кишоварзии Агентии таъминоти амволи махсуси назди Ҳукумати Ҷумҳурии Тоҷикистон даъват карда мешаванд.