Бо мақсади пешгирӣ аз паёмадҳои ногувори коронавирус, ки дар саросари олам хурӯҷ дорад, дар назди сарвазири мамлакат Ситоди доимоамалкунанда таъсис ёфтааст. Ситод ҳамарӯза ҷаласаҳо барпо намуда, гузориши сохторҳои марбутаро баррасӣ ва дастурҳои мушаххас дар ин самт медиҳад. Аз ҷумла, бобати бо мақсад истифода гардидани кумакҳое, ки аз кишварҳои гуногун ба Тоҷикистон мерасанд. Ҳамин тавр, саъю кӯшиш ба харҷ дода мешавад, ки пеши роҳи афзоиши ин вабо гирифта шавад.

Ҳамсоякишвари Ӯзбекистон аз зумраи давлатҳое маҳсуб меёбад, ки бобати пешгирӣ аз вабои коронавирус аввалин шуда ба Тоҷикистон кумакҳои башардӯстона интиқол додааст. Кумак тавассути чандин қатора ба кишвар ворид шуда, либосҳо ва айнакҳои тибӣ, дастпӯшакҳо, ҳароратсанҷ ва маводи ғизои (орд)-ро дар бар мегирад.

Аз кишвари шарики стратегӣ, яъне Русия тавассути идораи “Ростпотребнадзор” низ кумакҳои башардӯстона ба Тоҷикистон ворид гардид. Аз ҷумла, ду ҳазор адад васоити ташхиси вирусӣ (тест) фиристода шуд.

Бобати пешгирӣ аз паҳну афзоиши коронавирус Қазоқистон ҳам ба Тоҷикистон ёрии башардӯстона расонд. Ҳукмати Қазоқистон бо мақсади таъмини бехатарии озуқа дар давраи хӯрӯҷи ин вабо ба Тоҷикистон панҷ ҳазор тонна орд фиристод.

Дар баробари расондани кумакҳои гуногун иборат аз маводи ғизоӣ, сару либос ва таҷҳизоти тибӣ, ҳамчунин созмонҳои байналмилалӣ ва кишварҳои алоҳида тасмим гирифтаанд, ки ба кишвар ёрии молиявӣ расонданд.

То кунун давлати Олмон - 1 млн. евро, ИМА – 866 ҳаз. доллар, бонки ҷаҳонӣ – 11 млн. доллар, бонки осиёии рушд – 100 ҳаз. доллар ёрӣ расондаанд.

Барномаи рушди ССМ ният дорад ба Тоҷикистон ба андозаи 600 ҳазор доллар ёрӣ расонад. Ин кумак барои муҳофизати қишрҳои осебпазир аз вабои коронавирус пешбинӣ шудааст.

Кумаки аз ҳама бештарро Иттиҳоди Аврупо нияти расондан дорад. Иттиҳод мехоҳад барои пешгирии ин вабои марговар ба Тоҷикистон 48 млн. евро ёрӣ расонад. Аз ин ҳисоб 1,3 миллион евро барои хариди васоити муҳофизавӣ, маҳлулҳои беҳдошт барои беморхонаҳо, васоити тамизкунӣ, дастпӯшаку ниқобҳо барои сарҳадбонони тоҷик пешбинӣ шудааст. Аз маблағҳои ҷудонамудаи бонки ҷаҳонӣ 3 млн. доллар бояд барои ёрӣ расондан ба оилаҳои камбизоат сарф гардад. Бонки осиёии рушд оҷилан ба кишвар 100 ҳазор долар ёрӣ расонда, боз ният дорад 50 млн. доллари дигар кумак расонад.

Вусъати кумакҳо ва дасти ёрӣ расондани кишвару созмонҳои гуногун бобати пешгирӣ аз вабои коронавирус гувоҳ аз тадбирҳои дурусти пешгирифтаи Ҳукумати кишвар дар сиёсати берунист. Маҳз муносибати нек бо ҳамсоягон ва дигар кишварҳо, ҳамчунин созмонҳои мухталифи олам боис гашт, дар чунин рӯзҳои душвор барои мардуми тоҷик кумакҳо дар шаклҳои гуногун расонда шавад.

Сарф ва истифодаи оқилонаю холисонаи маблағу воситаҳо ва маводи озуқавории воридшуда бошад, ба зиммаи нафарони масъул аст. Маҳз онҳоро лозим аст аз рӯи адлу инсоф рафтор намоянд, то кумакҳо ба ҷои лозима расида ва аз рӯи таъинот сарф шаванд.