Дар доираи сафарашон ба кишвари Италия Президенти Ҷумҳурии Тоҷикистон муҳтарам Эмомалӣ Раҳмон бо намояндагони тоҷикони муқими Италия, аз ҷумла бо донишҷӯёни тоҷик низ мулоқот намуданд.

Бино ба иттилои Хадамоти матбуоти Президенти кишвар зимни вохӯрӣ Пешвои миллат нахуст аз ҳолу аҳвол, шароити таҳсил ва корашон пурсон шуданд.

Гуфта мешавд, ки Президенти кишвар доир ба дастгирию ғамхориҳои Ҳукумати кишвар барои беҳсозии шароити будубоши ҳамдиёрони бурунмарзӣ, бахусус ҷавонон, ки ба омӯзиши илму ҳунар дар хориҷи кишвар машғуланд, андешаронӣ намуданд.

Дар ин мулоқот Сарвари давлат донистани забонҳои хориҷӣ ва аз худ кардани нозукиҳои техникаю технологияи муосирро амри зарурӣ шумориданд.

Ҳамзамон таъкид гардид, ки дар доираи сиёсати хориҷии Ҳукумати кишвар ва ҳамкорӣ бо кулли ҷаҳон ҳамасола барои идомаи таҳсили ҷавонон квотаҳо ва барои муҳоҷирони корӣ санадҳои муҳими танзимкунандаи будубоши онҳо таҳия ва қабул мегардад.