СИЁСАТ
Панҷшанбе 26 Май 2022 08:16
1762
21.10.2016. Дар Қасри Миллат Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо вазири корҳои хориҷии Ҷумҳурии Туркия Мавлуд Човушоғлу мулоқот кард. Дар суҳбат ҳолати кунунӣ ва дурнамои робитаҳои дуҷонибаи Тоҷикистону Туркия ва дигар масоили умдаи рӯз мавриди баррасӣ қарор гирифт.

Сарвари давлат нахуст ҷонибдории Тоҷикистонро аз раванди таҳкиму тавсеаи муносибатҳои дарозмуддати неку дӯстона бо Туркия ва созгории ин мавқеъро бо усули умдаи сиёсати хориҷии Тоҷикистон таъкид намуд. Ба ҳамкориҳои дуҷонибаву бисёрҷонибаи ду кишвар дар арсаи байналмилалӣ, ки дар заминаҳои сиёсӣ, иқтисодӣ, фарҳангӣ ва дигар соҳаҳои мавриди таваҷҷуҳи тарафайн роҳандозӣ шудаанд, ишора карда, таъкид гардид, ки дар ин раванд усулҳои пазируфташуда ва халалнопазири дӯстии пойдор, баробарҳуқуқӣ ва эътимоду эҳтироми мутақобила хоси робитаҳои Тоҷикистону Туркия мебошанд. Ҳамкориҳои иқтисодию тиҷоратӣ қисмати муҳими муносибатҳои дуҷонибаи Тоҷикистон ва Туркия арзёбӣ гардид.

Тавре таъкид шуд, имрӯз ҳаҷми мубодилаи мол байни ду кишвар ба зиёда аз 200 миллион доллари амрикоӣ расидааст ва дар қаламрави Тоҷикистон 88 ширкати туркӣ ба қайд гирифта шудаанд. Ҷонибҳо ба мувофиқа расиданд, ки талошҳои минбаъдаи муштарак ҷиҳати тавсеаи ҳамкорӣ, аз ҷумла дар самти афзоиши гардиши мол бар нафъи мардуми ду кишвар хоҳад буд.

Дар мулоқот омодагию ҳавасмандии ҷониби Тоҷикистон барои идомаи ҳамшарикӣ дар соҳаи сармоягузорӣ ва таъсиси корхонаҳои мушатарак дар бахшҳои истеҳсолии иқтисодиёт таъкид гардида, иштироки Туркия дар татбиқи тарҳҳои марбут ба бунёд ва таҷдиди зерсохторҳои энергетикӣ ва нақлиётию коммуникатсонии Тоҷикистон, ки аҳамияти бузурги минтақавӣ доранд, муҳим арзёбӣ карда шуд. Ҳамчунин, масоили фарҳангӣ ва ҳамкорӣ дар дигар соҳаҳои иҷтимоӣ, ки омили муҳими таҳкими дӯстиву рафоқати байни халқҳои ду давлат мебошанд, мавриди баррасӣ қарор гирифт.

Дар идома Президенти ҷумҳурӣ Эмомалӣ Раҳмон зарурати муборизаи дастаҷамъонаро ба муқобили терроризму ифротгароӣ ва дигар хатару таҳдидҳои ба амнияти минтақа ва ҷаҳон таъсири ногувордошта, ки Тоҷикистон ва Туркия дар ҷабҳаҳои пеши мубориза бо онҳо қарор доранд, махсус таъкид намуд. Муборизаи муштарак алайҳи терроризм ва ифротгароӣ ба хотири таъмини амнияту суботи ҳар ду давлат ва минтақа яке аз соҳаҳои авлавиятноки ҳамкориҳои дуҷониба арзёбӣ шуд. Ба таъкиди Сарвари давлат, муҳтарам Эмомалӣ Раҳмон терроризм дину маҳзаб, миллату ватан надошта, ҷониби Тоҷикистон дар мубориза бо терроризму экстремизм истифода аз “стандартҳои дугона”-ро қабул надорад. Дар ин замина аз Туркия хоста шуд, то ҷиҳати андешидани чораҳои муассиру таъхирнопазири боздошту истирдоди шаҳрвандони Тоҷикистон, ки барои даст доштанашон дар аъмоли террористию экстремистӣ мавриди кофтуков қарор дошта, дар қаламрави Туркия паноҳ бурдаанд, мусоидат кунад.

Ҳамчунин, Сарвари давлат зарурати роҳандозии иқдомҳои ҳамоҳангшудаи қатъиро дар самти пешгирии ҳолатҳои тавассути Туркия пайвастани шаҳрвандони Тоҷикистон ба ташкилотҳои террористӣ бо мақсади иштирок дар задухурдҳои минтақаи Ховари Миёна таъкид намуд.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.