Сафири фавқулода ва мухтори Ҷумҳурии Тоҷикистон бо муовини вазири корҳои дохилии Давлати Қатар вохӯрӣ намуда, аз ҷумла Созишномаи байниҳукуматӣ доир ба ҳамкорӣ дар соҳаи амният ва масъалаҳои экстремизму терроризмро баррасӣ намуданд.

Дар ин бора Вазорати корҳои хориҷии кишвар иттилоъ медиҳад.

Бино ба иттилои манбаъ, 10 июли соли равон мулоқот миёни Нурмурод Маҳмадалӣ сафири фавқулода ва мухтори Ҷумҳурии Тоҷикистон дар Давлати Қатар бо Абдулло ибни Халаф бин Ҳаттоб ал-Каъбӣ муовини вазири корҳои дохилии Давлати Қатар баргузор гардид.

Гуфта мешавад, ки дар рафти суҳбат ҷонибҳо масъалаҳои густаришу таҳкими ҳамкориҳо байни вазоратҳои корҳои дохилии Тоҷикистону Қатар ва татбиқи амалии Созишномаи байниҳукуматӣ доир ба ҳамкорӣ дар соҳаи амниятро баррасӣ карданд.

Инчунин зикр гардид, ки атрофи масоили тақвияти ҳамкориҳои дуҷониба дар самти мубориза бо терроризми байналмилалӣ ва роҳандозии ҳамкориҳо байни сохторҳои соҳавии ҳарду кишвар табодули афкор сурат гирифт.