Имрӯз, 22-юми июн, дар Китобхонаи миллии Тоҷикистон таҳти унвони “Нақши матбуоти тоҷик дар тарғиби арзишҳои Ваҳдати миллӣ” конфронси илмӣ-амалӣ баргузор гардид.

Дар ифтитоҳ Сайфиддин Назарзода, директори Китобхонаи миллӣ инштирокчиёнро бо Рӯзи Ваҳдати миллӣ таҳният гуфта, ёдовар шуд, ки баъд аз чанд рӯзе аз имзои санади басо муҳим ва барои халқу давлати мо тақдирсоз - Созишномаи умумии истиқрори сулҳ ва ризоияти миллӣ дар Тоҷикистон 19 сол пур мешавад. “Нуздаҳ соли эҳёи миллӣ, нуздаҳ соли баҳамоӣ, нуздаҳ соли худсозӣ ва худшиносиву худогоҳӣ, нуздаҳ соли сулҳу субот  ва оромӣ ва муҳимтар аз ҳама, нуздаҳ қадами устувор дар роҳи эъмори ҷомеаи шаҳрвандӣ, ки дар таърихи навини давлатдории мо бо ҳарфҳои заррин сабт мегарданд. Ба шарофати ин санади ҳаётан муҳим мо тавонистем, ки ба муноқишаҳои дохилӣ ва муқовимати мусаллаҳона хотима бахшида, марҳалаи нав, яъне гузоштани пойдевори сулҳ, таъмини ваҳдати миллӣ ва дар ин асос ба эътидол овардани фаъолияти соҳаҳои иҷтимоиву иқтисодии мамлакат ва рушди онҳоро оғоз намоем”, - афзуд дар идомаи суханаш С. Назарзода.

Сипас, Зиннатуллоҳ Исмоилзода, раиси Иттифоқи журналистони Тоҷикистон, Муродӣ Мурод, профессор, Маъруфи Абдуҷаббор, намояндаи Маркази тадқиқоти стратегии назди Президенти Ҷумҳурии Тоҷкистон, Хуршеди Атовулло, сардабири ҳафтаномаи “Фараж”, Носирҷон Маъмурзода, муовини сардабари рӯзномаи “Хатлон”, Маҳмудҷон Усмонов, котиби масъули рӯзномаи “Ҷавонони Тоҷикистон” дар мавзӯъҳои “Ҷумҳурият” ва масъалаҳои ваҳдати миллӣ”, “Матбуоти электронӣ ва рушди афкори ҷамъиятӣ”, “Матбуоти тоҷик дар давраи гузариш”, “Тараннуми сулҳу ваҳдати миллӣ дар нашрияҳои музофотии Тоҷикистон”, “Ҷавонони Тоҷикистон” - тарғибгари Ваҳдати миллӣ дар миёни ҷавонон” маърӯза намуданд.

Дар охир миёни иштирокчиён музокирот сурат гирифт.