Дирӯз, 28 октябр, дар Академияи идоракунии давлатии назди Президенти Ҷумҳурии Тоҷикистон курси такмили ихтисос барои сардорони сохторҳои кор бо ҷавонон ва варзиши вилоят ва шаҳру ноҳияҳо аз рӯйи барномаи “Сиёсати давлатии ҷавонон дар Ҷумҳурии Тоҷикистон” оғоз гардид. Дар ин бора аз шуъбаи таҳлил ва иттилоотии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Дар ифтитоҳи курси мазкур Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Ҳилолбӣ Қурбонзода, муовини директори Агентии хизмати давлатии назди Президенти Ҷумҳурии Тоҷикистон, Шоҳрух Ҳамидов, директори Донишкадаи такмили ихтисос ва бозомӯзии хизматчиёни давлатӣ ва Карамалишо Карамалишоев, муовини ректори Академияи идоракунии давлатии назди Президенти Ҷумҳурии Тоҷикистон, иштирок ва суханронӣ намуданд.

Ҳадаф аз баргузории курс, шарҳи Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” ва Кодекси одоби хизматчии давлатии Ҷумҳурии Тоҷикистон, баррасии мавзуҳои Мактаби давлатдории Эмомалӣ Раҳмон: масъалаҳои ташаккул ва рушд, унсурҳои асосии бунёди давлати муосир бо ҷаҳонбинии дунявӣ, забони коргузории мақомоти давлатӣ ва риояи қоидаҳои имлои забони тоҷикӣ, заминаҳои ҳуқуқии хизмати давлатӣ дар Ҷумҳурии Тоҷикистон ва дигар мавзуҳои қобили таваҷҷуҳ мебошад, ки бо ин роҳ шаҳрвандон аз он огоҳ кунонида мешаванд.

Ҷасури ҚИЁМИДДИН, “ҶТ”