18 март Пешвои миллат муҳтарам Эмомалӣ Раҳмон ба Владимир Путин, Президенти Федератсияи Русия дар робита ба пирӯзиаш дар интихоботи президентӣ барқияи табрикӣ ирсол намуданд.

Дар барқияи табрикӣ Пешвои миллат ҳамтои худро дар робита ба пирӯзиаш дар интихоботи президентӣ самимона табрик намуда, гуфтаанд, ки “натиҷаҳои овоздиҳии доиргардида боз як далели возеҳи тасдиқи обрӯву эътибори баланди сиёсии Шумо ва аз ҷониби ҷомеаи Русия ба таври васеъ ҷонибдорӣ ёфтани сиёсати давлатиатон ҷиҳати таъмини рушди устувори иҷтимоиву иқтисодии кишвар ва таҳкими мавқеи байналмилалии он мебошад”.

Пешвои миллат изҳор доштаанд, ки ҷониби Тоҷикистон ба густариши бемайлони шарикии стратегӣ ва ҳамкории ҳампаймонии Тоҷикистону Русия аҳаммияти пайваста медиҳад.

“Омодаем, ки якҷо бо Шумо дар оянда низ ҷиҳати ба сатҳи баланди нав баровардани ҳамкориҳои гуногунҷанбаи ду кишвар ба нафъи мардумонамон талошҳои муштарак ба харҷ диҳем.

Сидқан ба Шумо, муҳтарам Владимир Владимирович, сиҳатмандии комил ва дар татбиқи нақшаҳое, ки дар роҳи некӯаҳволӣ ва шукуфоии Русияи бародар муайян кардаед, комёбиҳои нави барҷаста орзумандам,”-омадааст дар поёни табрикот.