Имрӯз Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Президенти Ҷумҳурии Қазоқистон муҳтарам Қосим-Жомарт Токаев барқияи шодбошӣ ирсол намуданд.

Дар ин бора маркази матбуоти Президенти кишвар иттилоъ медиҳад.

Дар барқияи шодбошӣ нахуст Сарвари давлат Президенти Қазоқистонро барои пирӯз гардиданаш дар интихоботи президентӣ шодбош гуфта, чунин қайд намудааст:

“Бори дигар ба маснади олии давлатии Президенти Ҷумҳурии Қазоқистон интихоб гардиданатон далели равшани нуфузи баланди сиёсии Шумо ва дастгирии мардум аз роҳи пешгирифтаатон, ки ба рушди афзоишёбандаи иҷтимоию иқтисодии кишвар ва таҳкими мавқеи он дар арсаи байналмилалӣ нигаронида шудааст, мебошад. Бовар дорам, ки дар давраи ояндаи роҳбарии Шумо Қазоқистони бародар дар ин роҳ ба қуллаҳои нав мерасад.

Мо талошҳои пайвастаи Шуморо барои ҳамаҷониба тавсеа ва таъмиқ бахшидани муносибатҳои дӯстӣ ва шарикии стратегии Тоҷикистон ва Қазоқистон баланд арзёбӣ менамоем”.

Президенти кишвар дар идомаи барқия аз ҳамкориҳои созандаи байнидавлатии ду кишвар сухан ронда, ба мардуми бародари Қазоқистон сулҳу субот ва шукуфоии устувор таманно намуданд.

Маврид ба зикр аст, ки интихоботи ғайринавбатии президентӣ дар Қазоқистон 20 ноябр баргузор шуда, бар асоси натиҷаҳои аввалия президенти феълӣ Қосим-Жомарт Токаев бо гирифтани зиёда аз 80%-и овозҳо пирӯз гардидааст.
Фарзонаи Умаралӣ