Бо фармони раисҷумҳури Тотористон ба Президенти Ҷумҳурии Тоҷикистон муҳтарам Эмомалӣ Раҳмон барои саҳми барҷастаашон дар рушди ҳамкорӣ миёни Тоҷикистону Тотористон ва таҳкими дӯстию тафоҳум миёни мардумон ордени “Дуслик” (Дӯстӣ) тақдим карда шуд.

Дар ин бора аз дафтари матбуоти Президенти Ҷумҳурии Тоҷикистон иттилоъ доданд.

Бино ба иттилои манбаъ орден дар як маросими бошукӯҳ ба Президенти Ҷумҳурии Тоҷикистон муҳтарам Эмомалӣ Раҳмон аз ҷониби худи Рустам Минниханов, Президенти Ҷумҳурии Тотористони Федератсияи Русия дода шуд.

Ордени “Дуслик” (Дӯстӣ) мукофоти олии Ҷумҳурии Тотористон ба шумор рафта, барои хизматҳои шоён ва саҳми барҷаста дар муносибатҳои байналмилалӣ ба шахсони хос дода мешавад. Ин орденро 25 апрели соли 2015 Шурои Олии Ҷумҳурии Тотористон таъсис додааст. Нахустин бор ин орден ба якумин Президенти Тотористон М. Ш. Шаймиев супурда шуда буд.