Нимаи дуюми рӯзи 27 сентябр Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон зимни сафари корӣ ба ноҳияи Рашт дар назди шумораи зиёди сокинон, ки барои вохӯрӣ дар варзишгоҳи марказӣ ҷамъ омада буданд, суханронӣ карда, барномаи рангину бошукуҳи идонаи устодони санъат ва ҳаваскоронро ба ифтихори 25-солагии Истиқлолияти давлатии Тоҷикистон тамошо намуд.

Нахуст Пешвои миллат, муҳтарам Эмомалӣ Раҳмон ҳозирин ва дар шахси онҳо сокинони кишварро бо ҷашни муқаддасу мубораки 25-солагии Истиқлолияти давлатӣ табрику таҳният гуфт.

Сарвари давлат бо қаноатмандӣ таъкид дошт, ки дар натиҷаи ғамхориву дастгириҳои доимии Ҳукумати мамлакат ва бо туфайли заҳмату талоши ватандӯстонаи сокинон симои ноҳияи Рашт куллан дигаргун шудааст. Президенти мамлакат бунёди як қатор иншооти хурду калони соҳаҳои иҷтимоию иқтисодӣ, аз ҷумла мактабу марказҳои саломатӣ, коргоҳу корхонаҳои истеҳсолӣ ва биноҳои нави хизматрасониву маъмуриро намунаи дастовардҳои ноҳия дар зарфи солҳои соҳибистиқлолӣ маънидод кард.



Таъкид гардид, ки дар замони истиқлолият дар ноҳияи Рашт барои сохтмону таҷдиди иншооти гуногун қариб 500 миллион сомонӣ маблағгузорӣ шуда, дар ҳаҷми 360 миллион сомонӣ фондҳои асосӣ ба кор андохта шудаанд. Аз ҳисоби лоиҳаҳои давлатии сармоягузорӣ бо маблағи 310 миллион сомонӣ корҳои сохтмону барқароркунӣ ба анҷом расонида шудааст. Илова бар ин, барои ҳалли масъалаҳои иҷтимоии ноҳия дар 10 соли охир 149 лоиҳаи давлатии сармоягузорӣ ба маблағи зиёда аз 270 миллион сомонӣ татбиқ карда шудааст.
Зикр шуд, ки бо мақсади таъмини пешрафти соҳаҳои гуногуни ҳаёти ноҳия ва ба ин васила баланд бардоштани сатҳи зиндагии сокинон Барномаи рушди иҷтимоиву иқтисодии ноҳияи Рашт барои солҳои 2012-2016 қабул ва дар амал татбиқ карда мешавад.

Дар қатори дигар шаҳру ноҳияҳои кишвар Ҳукумати мамлакат ба масъалаи рушди соҳаҳои боғдорӣ, чорводорӣ, картошкапарварӣ, занбуриасалпарварӣ ва дигар бахшҳои муҳим дар ноҳияи Рашт тадбирҳои мушаххас меандешанд.

Дар охир Президенти мамлакат Эмомалӣ Раҳмон ба мардуми ноҳияи Рашт барои пазироии самимӣ ва ҷонибдории сиёсати созандаи Ҳукумати Ҷумҳурии Тоҷикистон изҳори сипос намуда, бо итминон иброз дошт, ки мардуми шарафманди ноҳияи Рашт минбаъд низ рисолати муқаддаси худро ба хотири тақвияти иқтидори давлати соҳибихтиёрамон ва таҳкими пояҳои он содиқона иҷро карда, ҳамаи кӯшишу талош ва ҳиммату ғайрати худро барои ободии Тоҷикистони азизамон сафарбар менамоянд.

Дар варзишгоҳи марказии ноҳияи Рашт барномаи бошукуҳи консертии устодони санъат ва ҳунрмандони ноҳия ба ифтихори 25-умин солгарди Истиқлолияти давлатии Тоҷикистон доир гардид.

Аҳли ҳунар бо барномаи рангини хеш дастовардҳои даврони соҳибистиқлолии кишварро тараннум карда, дар васфи Пешвову қаҳрамони миллат, муҳтарам Эмомалӣ Раҳмон ва файзи ваҳдату истиқлолият суруд хонданд.
Сарвари давлат, ҳамчунин намоишгоҳи ҳунарҳои мардумӣ ва расму оинҳои миллии сокинони ноҳияи Раштро тамошо кард.

Дар намоишгоҳ асосан мардуми меҳнатқарини ноҳия бо эҳтиром ба гузаштагони бузургу тамаддунофар, арҷгузорӣ ба муқаддасот ва расму оинҳои миллӣ, анъанаҳои неку ибратбахши ниёгон ба хотири эҳё ва рушди онҳо дастовардҳои даврони соҳибистиқлолӣ, маҳсули дасти устоҳои ҳунарманд ва дигар асбобҳои рӯзгорро пешниҳоди меҳмони олимақом Пешвои милллат муҳтарам Эмомалӣ Раҳмон карда буданд.



Дар ҷойи аввал кадбонуҳои ноҳия намудҳои гуногуни маҳсулоти нонӣ, нону кулча, қаламаю чапотӣ ва қариб 20 намуди анвои аз орд истеҳсолшавандаро ба маъраз гузоштанд. Сарвари давлат бо таваҷҷуҳ ба ин ҳунари бонувони ноҳияи Рашт ба онҳо барои тайёр кардани нонҳои ҳаҷман калон, ки маҳорати хоси пухтанро талаб менамояд, баҳои баланд дод.

Дар гӯшаи дигар маҳсулоти ширӣ, аз қабили ширу ҷурғот, чакаю равғани маска ва қурут ба маъраз гузошта шуд. Ба хотири иҷрои ҳидоятҳои Сарвари давлат Эмомалӣ Раҳмон оид ба захираи маводи хӯрока дар шакли консерва бонуҳои ноҳия дар намоишгоҳ зарфҳои шишагии пур аз меваҷоту сабзавотро бо риояи қоидаҳои санитарию гигиенӣ пешниҳод карданд.

Мушоҳида гардид, ҳунари дӯзандагӣ, бофандагӣ, зардузӣ, чакандӯзӣ, тоқидӯзию ҷуроббофӣ, шероздӯзӣ, атласу адрасбофӣ ва қолинбофӣ дар ноҳия ба таври назаррас рушд карда истодааст. Тавре бонувон зимни шиносоии Сарвари давлат Эмомалӣ Раҳмон аз маҳсули дасти аҳли ҳунар иброз доштанд, бо васеъ кардани доираи фаъолият дар хона ва коргоҳҳои алоҳида онҳо аз ин манфиати зиёд гирифта, барои пеш бурдани зиндагии худ истифода менамоянд. Занони ҳунарманд инчунин бо мақсади қонеъ кардани талаботи хонандагони мактабҳо духтани сару либоси мактабиро низ васеъ ба роҳ монда, бо мактабҳо шартномаи ҳамкорӣ бастаанд.

Дар ноҳияи Рашт дар баробари дигар ҳунарҳои мардумӣ заргарӣ низ аз байн нарафта, аз ҷониби оилаҳои алоҳида рушд ёфта, пойдор мемонад. Устоҳои чирадасти ноҳия намудҳои гуногуни маҳсулоти заргарӣ аз қабили гушвору муҳра, бозубанд ва дастмонаву дигар ороишоти нуқрагиро ба маъраз гузоштанд.

Дар ноҳияҳои минтақаи Рашт ҳунари чубтарошӣ, кандакорӣ ва дуредгарӣ маълуму машҳур аст ва дар намоишгоҳи имрӯза низ устоҳои ҳунарманди ҷамоатҳои деҳоти ноҳия табақҳои гуногуншаклу қошуқ, гаҳвора, сандуқ, дару тиреза, сабад ва асбобҳои мусиқиро бо ҳунари воло сохта, ба намоишгоҳ оварданд.

Пешвои миллат, муҳтарам Эмомалӣ Раҳмон баъди тамошои намоишгоҳ ба ҳунари волои занону бонувони ҳунарманд, устоҳои чирадаст, оҳангарону дуредгарон баҳои баланд дода, онҳоро ба эҳёи расму оинҳои миллӣ ва рушди анъанаҳои хоси аҷдодон ҳидоят намуд.