Шаби шанбе ба якшанбе дар наздикии варзишгоҳи "Vodafone Arena"-и Истанбул (Туркия), баъди вохӯрии дастаҳои футболи "Бешиктош" ва "Бурсаспор" ду таркиш ба амал омад, ки дар натиҷа 38 нафар ҷон бохта, 155 тани дигар захмӣ шуданд.

Дар робита ба ин Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба Президенти Ҷумҳурии Туркия Реҷаб Тайиб Эрдуғон барқияи тасаллият ирсол намуд, ки дар он омадааст:

"Ҷаноби Олӣ, дар робита ба ҳалокати даҳҳо шаҳрванди Ҷумҳурии Туркия ва ҷароҳати вазнин бардоштани теъдоди зиёди онҳо бар асари таркишҳои фоҷеабор дар назди варзишгоҳи шаҳри Истамбул тассалияти инҷонибро ба мардуми дӯсти Туркия ирсол медорам.

Мо ин амали интиҳории ғайриинсониро қатъиян маҳкум намуда, зарурати бетаъхири тақвияти муборизаи қотеонаро ба ҳар гуна зуҳуроти терроризм ва ифротгароӣ дар сатҳҳои мухталиф муҷаддадан таъкид менамоем.

Бо изҳори ҳамдардии амиқ ба аҳли наздикони фавтидагон, орзуманди шифои комили ҳамаи осебдидагон ҳастем".

Масъулияти ҳамлаҳои хунинро Ҳизби коргарони Курдистон ба зимма гирифтааст. Созмони "Шоҳини озодии Курдистон", ки қаблан низ масулияти як қатор ҳамлаҳои террористиро дар Туркия кори худ хонд, бо нашри як иттилоия дар сомонааш гуфтааст, ки таркишҳои шаби шанберо пайравонаш анҷом додаанд.

Дар Туркия як рӯз мотами миллӣ эълон шуд.