Дар доираи сафари кории хеш Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ВМКБ дар маркази ноҳияи Рӯшони ин вилоят майдони Нишони давлатиро ифтитоҳ намуданд.

Дар ин бора аз Хадамоти матбуотии Президент иттилоъ доданд.

Гуфта мешавад, ки майдони Нишони давлатӣ дар маркази ноҳия дар масоҳати 600 метри мураббаъ дар асоси лоиҳаи ҷолиб, дар паҳлуи парчами давлатӣ ҳамчун нишони эҳтирому арҷгузорӣ ба рамзҳои муқаддаси миллӣ бунёд шудааст. Баландии сутунпояи Нишони давлатӣ 20 метр буда, майдони назди он бо тахтасангҳо аз санги хоро ороиш ёфтааст.

Ҳамчунин, таъкид карда шуд, ки бо мақсади ободу зебо ва назаррабо гардидани майдони Нишони давлатӣ даромадгоҳ ва роҳравҳо сафолпӯш карда шуда, гулҳои рангоранг, дарахтони ороишию ҳамешасабз шинонида шудааст.

Хотиррасон бояд кард, ки корҳои сохтмонӣ дар майдони Нишони давлатӣ моҳи июл оғоз ёфта, бо саҳми соҳибкорони бо нангу номуси ноҳияи Рўӯшон ва сокинони маҳаллӣ дар муҳлати муайянгардида ва бо сифати баланд ба анҷом расонида шуд.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба корҳои анҷомёфта баҳои баланд дода, масъулонро ба вусъат бахшидани корҳои созандагиву ободонӣ ҳидоят намуданд.

Наҷиба МУРОДБЕКОВА, “ҶТ”