СИЁСАТ
Шанбе 26 Сентябр 2020 01:46
7242

Интихоботи навбатии президентӣ дар Ҷумҳурии Тоҷикистон рӯзи 11-уми октябри соли ҷорӣ баргузор мегардад. Дар ин бора Маҷлиси Олии Тоҷикистон рӯзи шашуми август қарор қабул кард.

Бар асоси қонун акнун ҳизбҳои сиёсӣ ва Иттифоқҳои касаба метавонанд, номзадҳои худро ба мақоми президентӣ пешниҳод кунанд.
Ин интихоботи шашуми президентӣ дар даврони соҳибистиқлолии кишвар буда, охирон интихоботи президентӣ дар ҷумҳурӣ моҳи ноябри соли 2013 баргузор шуда буд, ки аз он вақт то имрӯз бо ташаббуси Асосгузори сулҳу ваҳдати миллӣ, Пешвои миллат - Президенти кишвар муҳтарам Эмомалӣ Раҳмон дар соҳаи сиёсат як қатор пешравиҳои назаррас ба чашм мерасанд, ки баъзе аз масъалаҳои муҳими онро дар солҳои 2013 -2020 метавон аз дастовардҳои муҳим дар сиёсати давлатии кишвар номид.

ТАЪМИНИ АМНИЯТИ МАРДУМ

Яке аз муваффақиятҳои муҳими Ҳукумати кишвар дар соли 2015 ин буд, ки зиракии сиёсиро аз даст надода, дар як муддати кӯтоҳ тавонист, ки амалиёти хоинонро, ки бо сардории Назарзода сурат гирифт, бо муваффақият пешгирӣ намояд.

Ин амалиёти зиддитеррористӣ оид ба несту нобуд кардани дастаи мусаллаҳи собиқ муовини вазири мудофиаи Ҷумҳурии Тоҷикистон ҳоҷӣ Ҳалим Назарзода 16-уми сентябри соли 2015 ба пуррагӣ гузаронида шуд. Аз ҷониби Вазорати корҳои дохилии кишвар дар якуним шабонарӯз ин гурӯҳи мусаллаҳ дар дараи Ромит, воқеъ дар 110 километрии шаҳри Ваҳдат ва баландии 3700 метр аз сатҳи баҳр ба пуррагӣ аз байн бурда шуд. Дар натиҷаи муқобилияти шадиди мусаллаҳона нишон додан, зимни оташи ҷавобӣ, саркардагони гурӯҳи террористӣ ҳоҷӣ Ҳалим Назарзода, Эшони Ҷунайд Умаров ва 10 нафар ҳаммаслакони онҳо нест карда шуда, теъдоди зиёди аслиҳа ва лавозимоти ҷангӣ мусодира гардид ва амнияти мардум таъмин шуд.

Ба ҳисоби мақомот, тайи 12 рӯзи амалиёти зидди гурӯҳи Ҳоҷӣ Ҳалим аз ҷониби нерӯҳои ҳукуматӣ 14 нафар, аз ҷумла фармондеҳи гурӯҳи зиддитеррористии КДАМ Рустам Амакиев ва аз тарафи муқобил 27 нафар кушта шуда, 139 тани дигар бо иттиҳоми ҳамдастӣ бо ин гурӯҳ дастгир шуданд. Вазорати корҳои дохилӣ мегӯяд, алайҳи 100 нафар аз аъзои ин гурӯҳи мусаллаҳ парвандаҳои ҷиноӣ боз шудаанд.
Президенти кишвар муҳтарам Эмомалӣ Раҳмон дар ҳамон шабу рӯзҳо дар шаҳри Ваҳдат бо мардуми ин минтақа суҳбат орост ва барои кумакашон дар боздошти баъзе аз ҳамлагарон изҳори сипос намуда, иброз доштанд:

- Ба сокинони шаҳри Ваҳдат, ки барои дастгир кардани ҷинояткорон ба мақомоти корҳои дохилӣ ва амният кумак расонданд, барои чунин амали хайрхоҳона ва ватандӯстонаашон миннатдорӣ баён менамоям. Рӯҳафтода нашавед. Онҳое, ки мақсади нопок доранд, ҳеч гоҳ ба мақсадашон намерасанд. Агар ман шуморо иззату эҳтиром намекардам, имрӯз дар байни шумо набудам. Қатъиян таъкид месозам, ки шахсони гунаҳкор ҳатман дар назди қонун ҷавоб мегӯянд.

МУНОСИБАТИ ДӮСТОНАИ ТОҶИКИСТОНУ ӮЗБЕКИСТОН

Яке аз муҳимтарин дастоварди Тоҷикистон дар муддати 7 соли аз нав интихоб гардидани Президенти кишвар муҳтарам Эмомалӣ Раҳмон, ин ба роҳ мондани муносибатҳои дӯстона бо кишвари Ӯзбекистон буд, ки ин на танҳо муносибатҳои корӣ, балки мардуми ташнаи дидорро ба висоли дӯст, хешу табор ва ҳамсояи нек расонд.

Маҳз бо ташаббус ва кӯшишҳои сарони давлатҳо Президенти кишвари Ӯзбекистон Шавкат Мирзиёев бо сафари давлатӣ ба Ҷумҳурии Тоҷикистон ташриф овард. Ташрифи Шавкат Мирзиёев дар таърихи 9-10-уми марти соли 2018 аввалин сафари расмии Президенти Ӯзбекистон ба Тоҷикистон дар 18 соли охир буд. Онро муддати тӯлонӣ интизор буданд. Дар фурудгоҳи байналмилалии Душанбе Шавкат Мирзиёевро Президенти кишвар муҳтарам Эмомалӣ Раҳмон истиқбол гирифт.

Сафари давлатии Президенти Ӯзбекистон ба Тоҷикистон ва мулоқоту музокироти сатҳи олӣ бо кишвардори Тоҷикистон, имзои санадҳои нави меъёриву ҳуқуқии танзимкунандаи муносибатҳо барои таҳкими дӯстии мардумони ду кишвар заминаи мусоид фароҳам овард.
Маҳз бо ташаббуси Сарвари давлати мо мувофиқи созишномаи раводидӣ шаҳрвандони Тоҷикистону Ӯзбекистон тавонистанд, дар ҳудуди ин ду давлат то 30 рӯз бидуни ҳеҷ як иҷозатнома истиқомат кунанд.

Президенти кишвар муҳтарам Эмомалӣ Раҳмон ҳангоми сафари аввалини Шавкат Мизиёев ба Тоҷикистон гуфта буд, ки он ба рушди тамоми маҷмӯи муносиботи ҳамкории ду кишвар такони ҷиддӣ хоҳад бахшид.

“Мардумони моро суннатҳои бисёрасраи дӯстӣ, ҳамсоягии нек ва эҳтироми ҷонибайн муттаҳид месозад. Ҳамкорӣ бо Ҷумҳурии Ӯзбекистон яке аз афзалиятҳои асосии сиёсати хориҷии Ҷумҳурии Тоҷикистон маҳсуб меёбад. Тасмимоти имрӯзаи мо бар заминаи музокироти суратгиранда аз бисёр ҷиҳат хислати таърихӣ дошта, такконбахш мебошанд. Онҳо барои марҳала ба марҳала боло бурдани муносибатҳои Тоҷикистону Ӯзбекистон ба сатҳи сифатан нав асосу заминаи боэътимодро фароҳам меоваранд”, - дар ҳамин мулоқот таъкид карданд Президенти Ҷумҳурии Тоҷикистон.

Имрӯз маҳз бо талошҳову ташаббусҳои неки сарони давлатҳо қариб ҳамаи масъалаҳои баҳсноки вобаста ба сарҳад ҳалли худро пайдо карданд ва ин воқеият ба ҷонибҳо имконият дод, ки шартномаи дахлдорро дар ин хусус ба имзо расонанд. Дар ин асно, наздики 10 гузаргоҳи сарҳадӣ кушода шуд.

Дар ин замина қарори ҷонибҳо оид ба марҳала ба марҳала барқарор кардани фаъолияти ҳамаи гузаргоҳҳо дар сарҳади байни Тоҷикистону Ӯзбекистон низ муассир аст. Дар ин музокирот маросими баимзорасонии санадҳои дуҷониба сурат гирифт, ки аз 27 созишнома иборат буд ва онҳо аксари соҳаҳои калидии ҳамкориҳои Тоҷикистону Ӯзбекистонро дар бар мегиранд.
Президенти Ҷумҳурии Тоҷикис-тон ва Президенти Ҷумҳурии Ӯзбекистон Изҳороти муштараки ҷонибҳоро дар хусуси таҳкими дӯстӣ ва ҳусни ҳамҷаворӣ ва Шартномаи байнидавлатӣ оид ба қитъаҳои алоҳидаи сарҳади давлатии Тоҷикистон ва Ӯзбекистон ба имзо расониданд.

Дар ҳузури сарони ду давлат санадҳои зерини байниҳукуматӣ ва байниидоравӣ ба имзо расонида шуданд, ки барои таҳким ва густариши соҳаҳои гунонуни кишвар равон гардидаанд:
-Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон дар бораи алоқаи автомобилии байналмилалӣ, Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон дар бораи алоқаи ҳавоӣ, Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон дар бораи ҳамкорӣ дар таъмини фаъолияти сарбанди “Фарҳод”, Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба сафарҳои мутақобилаи шаҳрвандон, Барномаи ҳамкорӣ байни вазоратҳои корҳои хориҷии Тоҷикистону Ӯзбекистон, Созишнома байни Мақомоти иҷроияи ҳокимияти давлатии шаҳри Душанбе ва Ҳокимияти шаҳри Тошканд оид ба ҳамкориҳои тиҷоративу иқтисодӣ ва фарҳангиву гуманитарӣ, Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон дар бораи канорагирӣ аз андозбандии дукарата ва пешгирӣ намудани саркашӣ аз супоридании андоз аз даромад ва сармоя, Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон оид ба ҳамкориҳои молиявӣ ва ғайра.

СИЁСАТИ ДАВЛАТИИ ҶАВОНОН

Дар тӯли ҳафт соли охир ҷавонон низ дар ин миён дар ҷодаи сиёсат қадамҳои устувор монданд. Ҷавонон дар таҳкими суботу оромӣ ва пешрафти давлат нақши калидӣ доранд. Инро чандин маротиба Пешвои миллат муҳтарам Эмомалӣ Раҳмон дар суханрониҳои хеш ёдовар шудаанд. Ин буд, ки соли 2017 “Соли ҷавонон” эълон гардид ва ин тасмим нишони баланди сиёсати ҷавонпарваронаи роҳбари кишварро бори дигар собит намуд.
Дар тӯли ин солҳо Ҳукумати ҷумҳурӣ барои татбиқи “Стратегияи сиёсати давлатии ҷавонон то соли 2020”, “Консепсияи миллии сиёсати давлатии ҷавонон” ва дигар барномаҳои соҳавӣ дар маҷмуъ 840 миллион сомонӣ равона кардааст.
Дар ин давра марҳалаи чорум аз таъсиси Шӯрои миллии кор бо ҷавонон дар назди Президенти Ҷумҳурии Тоҷикистон (18 июли соли 2015) оғоз меёбад. Таъсиси Шӯро иқдоми навбатии мақоми олии сиёсии мамлакат дар ҳаёти сиёсиву иҷтимоии Тоҷикистон ба ҳисоб рафта, дар оянда робитаи бевосита ва самарабахши ҷавононро бо роҳбарияти кишвар таъмин менамояд. Тағйиру иловаҳои ба Конститутсияи мамлакат воридшуда (22 майи соли 2016) барои фаъолияти ҷавонон майдони боз ҳам фарох кушода, ҷиҳати иштирок дар идоракунии давлат ва интихоб ба мақоми роҳбарии шохаҳои ҳокимият заминаи мусоид фароҳам овард.

Инчунин, ҳамасола таҳти сарпарастии Президенти мамлакат баргузор намудани озмуни ҷумҳуриявии “Тоҷикистон – Ватани азизи ман”, ки дар Паёми имсола пешниҳод гардид, як қадами устуворе дар рушди маърифати сиёсии наврасону ҷавонон хоҳад буд.
Таъмини амният дар ҷомеа ва ҳифзи манфиатҳои миллӣ аз вазифаҳои муҳимтарини ҳар як давлати соҳибистиқлол буда, он дар доираи сиёсати ҳуқуқӣ ва дохилию хориҷии давлат роҳандозӣ карда мешавад ва яке аз шартҳои асосии рушди давлатдорӣ маҳсуб меёбад. Аз ин рӯ, бо итминони комил метавон гуфт, ки дастури Президенти кишвар дар Паёми имсолаашон ба Маҷлиси Олии ҷумҳурӣ дар бораи дар таҳрири нав таҳия намудани Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” ва омодасозии “Стратегияи сиёсати давлатии ҷавонон то соли 2030” барои иштироки бештари ҷавонон, хусусан, ҷавононе, ки берун аз муассисаҳои таълимиянд, дар таъмини амнияти ҷомеа мусоидат намуда, дар таҳкими мафкураи миллӣ ва маърифати сиёсии онҳо нақши бузурге мебозад.
Таъкид бояд кард, ки ҷавонони муосири мо қувваи бузурги созандаанд ва бо рушди тафаккури миллӣ ва маърифати сиёсии худ ин неруи тавонои кишвар метавонад, ки амнияти Тоҷикистони соҳибистиқлолро ҳимоя намоянд ва ин Ватанро ободу зеботар гардонида, номбардори сазовори номи ниёгони худ бошанд.

ТАВСЕАИ МУНОСИБАТҲОИ ХОРИҶӢ

Мусаллам аст, ки обрӯ ва нуфузи имрӯзаи Тоҷикистон дар арсаи ҷаҳонӣ самараи талошҳои пайгирона ва хастанопазири Президенти кишвар муҳтарам Эмомалӣ Раҳмон аст. Ӯ бо қабули масъулияти роҳбарии кишвар дар солҳои басо вазнин ва пайгирии ҳадафҳои олии созандагӣ манфиати умумимиллиро аз ҳамаи манфиатҳои дигар боло гузошта, боварии халқро соҳиб шуд. Корҳое, ки тайи солҳои гузашта анҷом дод, боис шуд, ки дар дохили мамлакат тамоми халқ, махсусан равшанфикрон ва неруҳои ақлонӣ ба нақшаву барномаҳои ояндаашон бо диди умед бингаранд ва бо боварӣ пайрави роҳаш бошанд.

Президенти мо ҳанӯз дар рӯзҳои душвор ва печидаи кишвар дар ташаккули сиёсати хориҷии Тоҷикистон, роҳандозии тамосу равобити дӯстона бо кишварҳои гуногун, созмонҳои байналмилалӣ ва ниҳодҳои молиявии ҷаҳонӣ ва муаррифии кишвару миллат дар ақсои олам нақши созанда ва беназир дорад. Даҳҳо кишвари хориҷӣ ва созмонҳои байналмилалӣ дар Тоҷикистон намояндагиҳои худро боз намуда, ҳамзамон дар кишварҳои гуногуни ҷаҳон – аз Осиё то Аврупо ва аз Африқо то Амрико намояндагиҳои дипломатӣ ва муассисаҳои консулии Тоҷикистон баҳри таҳкиму густариши ҳамкориҳои ду ва чандҷониба муваффақона фаъолият доранд.

Тоҷикистон ба узвияти созмонҳои бонуфузи байналмилалӣ пазируфта шуда, аз минбари онҳо ташаббусу ибтикорҳои созандаи Президенти кишвар ҷиҳати ҳалли мушкилоти ҷаҳону минтақа, аз ҷумла мубориза бар зидди терроризму ифротгароӣ, маводи мухаддир, ҷиноятҳои муташаккилонаи фаромиллӣ, масъалаҳои экологӣ ва амсоли он ба самъи ҷаҳониён расонида мешавад. Махсусан, силсилаи ташаббусҳои Пешвои миллат дар робита ба ҳалли мушкилоти об дар ҷаҳон, бо таваҷҷуҳ ба аҳамияти мавзӯъ, боиси ба гунаи хос муаррифӣ шудани Тоҷикистон дар арсаи байналмилалӣ гардид.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 1 2 3 4

Сентябр 2020 c.