СИЁСАТ
Шанбе 21 Сентябр 2019 08:33
1225
Имрӯз, 27 июл, Пешвои миллат, Президенти ҷумҳурӣ, муҳтарам Эмомалӣ Раҳмон бо сафари корӣ ба ноҳияи Мир Сайид Алии Ҳамадонии вилояти Хатлон рафт.



Сарвари давлат нахуст дар расми мавриди баҳрабардорӣ қарор додани хати нави оби нӯшокӣ дар маркази ноҳия иштирок кард. Дар даромадгоҳи Корхонаи воҳиди давлатии таъминоти оби ноҳия ба Сарвари давлат рафти татбиқи лоиҳаи «Беҳтар намудани таъмини оби нӯшокии аҳолии ноҳияи Мир Сайид Алии Ҳамадонӣ» муаррифӣ карда шуд. Президенти ҷумҳурӣ бо гардиш додани мурвати шоҳқубури асосии таъминоти оби нушокӣ ба сокинони ин ноҳия боз як пайки шодию нишот ва муждаи ободонӣ овард.

Хати нави оби нӯшокӣ бо маблағгузории Ҳукумати ҷумҳурӣ ва гранти Ҳукумати Ҷопон амалӣ гардида, барои беҳтар намудани ҳолати таъмини оби нӯшокии марказ ва зиёда аз 20 деҳаи ноҳия пешбинӣ шудааст. Лоиҳаи мазкур дар Ҷумҳурии Тоҷикистон яке аз барномаҳои калонтарини грантии таъмини аҳолӣ бо оби нӯшокии ҷавобгӯ ба меъёрҳои стандартӣ буда, саҳми ҷониби Ҷопон дар лоиҳа корҳои барқарорсозӣ, таҷдид, сохтмони иншооту хатҳои обгузари системаи обтаъминкунии маркази ноҳия - шаҳраки Москва, деҳаҳои Гулобод ва Навободро дар бар мегирад.

Сарвари давлат аз масъулини соҳа талаб намуд, ки пайваста дар беҳтар гардонидани сатҳи хизматрасонии обрасонӣ ба аҳолӣ тадбирҳои бетаъхир андешида, корҳои фаҳмондиҳии вобаста ба фарҳанги волои истифодабарии оби мусафои ошомиданиро дар миёни сокинон тақвият бахшанд.



Бо иштироки Президенти ҷумҳурӣ Эмомалӣ Раҳмон дар маркази ноҳияи Ҳамадонӣ бинои нави Шуъбаи маориф мавриди баҳрабардорӣ қарор гирифт. Маблағи умумии бунёди бинои Шуъбаи маориф, ки аз 3 ошёна иборат аст, дар маҷмуъ 2 миллиону 70 ҳазор сомониро ташкил медиҳад. Аз ҳисоби буҷаи ноҳия 1 миллиону 60 ҳазор сомонӣ ва аз ҳисоби Вазорати маориф ва илм 1 миллиону 10 ҳазор сомонӣ сарф шудааст. Барои хариди таҷҳизот, мизу курсӣ, 20 компютер ва дигар ҷиҳози зарурии корӣ бошад, 206 ҳазор сомонӣ ҷудо гардид.



Дар маркази ноҳия ҳамчунин бинои нави Нозироти андоз расман ифтитоҳ шуд. Кормандони Нозироти андоз дар ноҳияи Ҳамадонӣ то имрӯз дар бинои куҳна ва шароити начандон хуб фаъолият карда, аз норасоии ҳуҷраҳои корӣ ва техникаву таҷҳизоти муосири соҳавӣ танқисӣ мекашиданд. Бинои нав аз ду ошёна ва 8 утоқи корӣ, маҷлисгоҳ бо 60 ҷойи нишаст, таҳхона, ошхона ва идораи бойгонӣ иборат мебошад.



Сипас, Пешвои миллат, муҳтарам Эмомалӣ Раҳмон дар Ҷамоати Қаҳрамон бо ҷараёни корҳои кишоварзӣ ва дастовардҳои меҳнаткашони ноҳия шинос шуд. Дар ноҳияи Ҳамадонӣ 68 фоизи аҳолӣ ба истеҳсоли маҳсулоти кишоварзӣ машғуланд. Иттилоъ дода шуд, ки имсол аз ҳар гектар замини обӣ деҳқонон аз 35 то 37-сентнерӣ гандум рӯёнидаанд. Айни ҳол дар заминҳои ҷамоат кишти такрорӣ бомаром идома дорад.



Дар ҳамин ҷо Президенти ҷумҳурӣ, инчунин бо фаъолияти хоҷагии деҳқонии "Дилшоди Шариф" шинос гардид. Дар хоҷагӣ, ки 18 гектар заминро дар ихтиёр дорад, асосан пахтаи навъи 65-30 кишт шудааст. Ин тухмӣ ба иқлими ноҳия хеле мувофиқ буда, ҳоло нашъунамои хуб дорад. Тавре иттилоъ доданд, дар 854 хоҷагии деҳқонии Ҷамоати деҳоти Қаҳрамон дар майдони 1100 гектар пахта кишт шудааст.

Пас аз шиносоӣ бо корҳои саҳроӣ Сарвари давлат бо дастовардҳои деҳқонони ноҳия шинос гардид. Соли равон деҳқонони ноҳия аз маҳсулоти полезӣ даромади хуб ба даст оварданд. Маҳсулоти дастранҷи барзгарон на танҳо дар ҷумҳурӣ ба фуруш бароварда мешавад, балки берун аз кишвар низ содирот мегардад.



Дар Ҷамоати номбурда, ҳамчунин Муассисаи таҳсилоти миёнаи умумии рақами 12 барои 624 хонанда дар як баст ифтитоҳ шуд. Мактаби нав дар паҳлӯи бинои пешинаи муассисаи таълимӣ сохта шудааст. Тибқи дастури Президенти мамлакат бинои пештараи мактаб баъди таъмир ҳамчун боғчаи бачагона истифода карда мешавад.

Барои беҳтар кардани сифати таълиму тарбия дар мактаби нав 23 синфхона, лабаратория, синфи компютерӣ, китобхона, толори маҷлис бо 260 ҷойи нишаст, толори варзиш ва ошхона бо 200 ҷой муҳайё гардидааст. Он аз тарафи сохтмончиёни Ҷамъияти дорои масъулияташ маҳдуди “Ҳамсафар” бо 2 миллиону 350 ҳазор доллар маблағҳои Бонки Исломии Рушд бунёд шудааст. Илова ба маблағи сохтмони мактаб баҳри таъмини таҷҳизоти хониш ва дигар ашёи лозима Вазорати маориф ва илми ҷумҳурӣ беш аз 2 миллион сомонӣ маблағ ҷудо кардааст. Мактаб ҳамчунин бо 20 компютер ва 10 принтер таъмин гардид.



Дар боғи марказии фарҳангу фароғати ноҳия Президенти ҷумҳурӣ бо фаъолону сокинон мулоқот кард. Нахуст Сарвари давлат Эмомалӣ Раҳмон ба мардуми заҳматкаши ноҳия барои саҳми арзандаашон баҳри ободию пешрафти ин гӯшаи зебои диёр ва пазироии гарму самимӣ арзи сипос намуда, сокинони ноҳияро бо ҷашни бузургу муҳаддаси умумимиллии дарпешистода - 25-солагии Истиқлолияти давлатии Ҷумҳурии Тоҷикистон табрику таҳният гуфт.



Таъкид шуд, ки дар давоми 25 сол бо мақсади рушди иқтисоди ноҳия ва беҳтар гардонидани сатҳи некӯаҳволии сокинон аз ҳисоби ҳамаи сарчашмаҳои маблағгузорӣ қариб як миллиард сомонӣ, аз ҷумла 600 миллион сомонӣ аз буҷети давлатӣ равона шудааст. Дар ин давра аз буҷети давлатӣ танҳо барои таъмиру нигоҳдории роҳҳои мошингард 10 миллион сомонӣ ҷудо гардидааст. Ба хотири таъмини зиндагии сазовор «Барномаи рушди иҷтимоиву иқтисодии ноҳияи Мир Сайид Алии Ҳамадонӣ барои солҳои 2011-2015» қабул гардида, дар доираи он 77 лоиҳа ба маблағи 132 миллион сомонӣ татбиқ шуд.



Президенти мамлакат бо қаноатмандӣ изҳор дошт, ки соли ҷорӣ татбиқи «Барномаи рушди иҷтимоиву иқтисодии ноҳия барои солҳои 2016-2020» оғоз гардид, ки тибқи он дар ноҳия 177 лоиҳа ба маблағи умумии 206 миллион сомонӣ бояд амалӣ карда шавад. Аз маблағи зикршуда 47 лоиҳа ба маблағи 55 миллион сомонӣ ба бахши иқтисод, 68 лоиҳа дар ҳаҷми 56 миллион сомонӣ ба бахши иҷтимоӣ, 38 лоиҳа бо маблағи 71 миллион сомонӣ ба бахши инфрасохтор ва 15 лоиҳа дар ҳаҷми 17 миллион сомонӣ барои чорабиниҳои ҳифзи муҳити зист ва ҳолатҳои фавқулодда пешбинӣ шудааст. Ғайр аз ин, дар давоми солҳои 2016-2018 аз ҳисоби ҳамаи манбаъҳои маблағгузорӣ ҷудо кардани зиёда аз 210 миллион сомонӣ пешбинӣ гардидааст.

Масъалаи беҳтар кардани вазъи иҷтимоии сокинон, бахусус таъсиси ҷойҳои нави корӣ ва бо шуғл фаро гирифтани аҳолӣ, дастгирии рушди соҳибкорӣ, истифодаи самараноки замин, истеҳсолу содироти маҳсулоти кишоварзӣ, истифодаи иқтидору имкониятҳои истифоданашудаи саноатӣ, беҳдошти вазъи соҳаҳои маорифу тандурустӣ, фарҳанг ва тарбияи ҷавонону наврасон дар руҳияи ватандӯстӣ аз мавзуъҳои муҳими суҳбати Президенти мамлакат бо сокинони ноҳия буд.



Дар идомаи сафари корӣ Президенти ҷумҳурӣ аз қисми низомии 2133 Қӯшунҳои сарҳадии Кумитаи давлатии амнияти миллӣ дидан намуд. Аснои боздид дар Отряди сарҳадии «Ҳамадонӣ» Сарфармондеҳи олии Қувваҳои мусаллаҳи мамлакат, нахуст бо низоми фаъолият дар ин отряди муҳими сарҳадӣ, ки дорои тамоми ҷузъу томҳои муосири марзбонӣ ва дидбонгоҳҳои навбудёду замонавӣ мебошад, шиносоӣ пайдо намуд. Ба Сарвари давлат ҳамзамон осорхонаи таърихӣ бо дастовардҳои замони соҳибистиқлолӣ муаррифӣ гардида, дар он аз рӯи марҳилаҳои ташаккул то ба мукаммалгардонии сипари боэътимоди миллӣ, ки имрӯз номи Қӯшунҳои сарҳадиро соҳиб аст, намоиш дода шуд.

Баъди суҳбат бо афсарону сарбозон дар ҳузури Сарфармондеҳи олии Қувваҳои мусаллаҳи ҷумҳурӣ Эмомалӣ Раҳмон бо иштироки хизматчиёни ҳарбии ҷузъу томҳои Қӯшунҳои сарҳадӣ ва отряди таъиноти махсуси милитсияи кишвар гузашти низомӣ ва намоиши техникаҳои ҳарбӣ доир гардид.

Дар майдони ҳавоии Отряди сарҳадии «Ҳамадонӣ» техникаҳои зиреҳпӯши ҷангию нақлиётӣ, артиллерияҳои худгард, намудҳои мухталифи тӯб ва дигар лавозимоти ҷангии муосир, дар маҷмуъ 20 номгӯй техникаи ҳарбӣ ба намоиш гузошта шуд.

Ёдовар мешавем, ки масъулияти ҳифзи марзи кишвар дар минтақаи Ҳамадонӣ соли 2005 пурра бар уҳдаи сарҳадбонони Отряди сарҳадии «Ҳамадонӣ» вогузор гардида, он то ба имрӯз чун сипари боэътимод ва пуриқтидори давлату миллат фаъолият дорад.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.