Вазири корҳои хориҷии Тоҷикистон Сироҷиддин Муҳриддин 21 октябр сафири тозатаъини Беларус дар Тоҷикистон Виктор Денисенкоро ба ҳузур пазируфт.

Бино ба иттилои ВКХ, дар рафти мулоқот маросими супоридани нусхаҳои эътимоднома аз ҷониби сафири Беларус ба вазири корҳои хориҷӣ сурат гирифт.

Гуфта мешавад, ҳамсуҳбатон ҳамчунин доир ба вазъ ва дурнамои рушди муносибатҳои шарикии стратегии Тоҷикистону Беларус мубодилаи афкор намуданд.

Сироҷиддин Муҳриддин ба Виктор Денисенко дар амалисозии фаъолияти худ ба мақсади боз ҳам густариш додани робитаҳои дӯстонаи Тоҷикистону Беларус муваффақият орзу кард.

Ёдрас мекунем, ки 21 сентябр Александр Лукашенко, президенти Беларус Виктор Денисенкоро сафири ин кишвар дар Тоҷикистон таъин кард. Пеш аз Денисенко вазифаи сафирии Беларус дар Тоҷикистонро Олег Иванов бар уҳда дошт.