Имрӯз Шаҳбоз Шариф, сарвазири Ҷумҳурии Исломии Покистон бо сафари расмӣ ба Ҷумҳурии Тоҷикистон ташриф овард.

Дар Фурудгоҳи байналмилалии Душанбе Шаҳбоз Шарифро Қоҳир Расулзода, Сарвазири Ҷумҳурии Тоҷикистон ва дигар шахсони расмӣ истиқбол гирифтанд.

Тавре АМИТ “Ховар” хабар медиҳад, Сарвазири Ҷумҳурии Исломии Покистон пас аз маросими истиқболи расмӣ дар майдони “Дӯстӣ”-и шаҳри Душанбе дар пояи муҷассамаи асосгузори давлати тоҷикон Исмоили Сомонӣ гулчанбар гузошт.

Гуфта мешавад, ки дар доираи ин сафар мулоқоту музокироти сатҳи баланди давлатӣ байни Ҷумҳурии Тоҷикистон ва Ҷумҳурии Исломии Покистон пешбинӣ гардида, доираи васеи ҳамкории дуҷониба баррасӣ мешавад. Ба имзо расидани бастаи санадҳои байниҳукуматӣ ва байнисоҳавӣ низ дар назар аст.

Ҳамчунин тибқи барномаи сафар Сарвазири Ҷумҳурии Исломии Покистон бо Раиси Маҷлиси намояндагони Маҷлиси Олии Ҷумҳурии Тоҷикистон ва Сарвазири Ҷумҳурии Тоҷикистон мулоқот хоҳад кард.

Ёдовар мешавем, ки сафари Шаҳбоз Шариф ба Тоҷикистон нахустин сафари кории хориҷӣ пас аз интихоб шуданаш ба маснади Сарвазири Ҷумҳурии Исломии Покистон аст.