Имрӯз, 25-уми сентябр дар муассисаи таҳсилоти миёнаи умумии №6-и ноҳияи Исмоили Сомонӣ ҳамоиши соҳибкорони ҷавон таҳти унвони “Интихоби мо-пешвои миллат” баргузор гардид.

Ҳамоиши мазкур, бо иштироки муовини раиси Иттифоқи ҷавонони Тоҷикистон Раҳимзода Умедҷон, соҳибкорони ҷавон, инчунин хонандагону ҷавонони фаъол сурат гирифт.

Дар ҳамоиш сараввал муовини раиси Иттифоқи ҷавонони Тоҷикистон Раҳимзода Умедҷон суханронӣ намуда, иброз доштанд, ки дар даврони шӯравӣ фаъолияти соҳибкорӣ мамнуъ буд ва ҳама чиз моликияти давлатӣ буд, аз ин хотир рушди соҳибкорӣ номумкин буд. Аввалин қадаме, Президенти кишвар барои рушди соҳибкорӣ ниҳоданд, ин тасвиби қонунҳои амалкунанда дар бораи соҳибкорӣ буд. Аз ҷумла, Қонуни Ҷумҳурии Тоҷикистон “Дар бораи хусусигардонии моликияти давлатӣ” аз зумраи чунин қонунҳоест, ки ба рушди фаъолияти соҳибкорӣ ва дастгирии соҳибкорон заминаи мусоиде фароҳам овард. Ҳоло дар кишвар аз 189 ҳазор соҳибкори инфиродӣ фаъолият мекунанд, ки аз ин шумора 51 ҳазорашро ҷавонон ташкил медиҳанд.

Инчунин ӯ дар идома афзуд: “Ҳамасола Президенти мамлакат муҳтарам Эмомалӣ Раҳмон бо соҳибкорон во мехӯранд. Дар хотир дорам, ки Пешвои миллат гуфта буданд: “Дар Япония мегӯянд, ки соҳибкорон хазинаи тилоии давлатанд” ман низ ҳамин гуна фикр мекунам, ки дар Тоҷикистон соҳибкорон хазинаи тилоии миллатанд”.

Дар идома Сайфҳусейнов Шариф, намояндаи КВД “Хӯроки умумӣ”-и ноҳияи Исмоили Сомонӣ баромад намуда, вобаста ба рушди соҳибкорӣ ва фароҳам овардани шароитҳои мусоид дар ин соҳа, дар 7 соли ахир суханронӣ намуд.

Пас аз баромад иштирокчиён ба хотири рушди устувори иқтисодӣ, пойдории сулҳу суботи сартосарӣ, таъмини шароити зиндагии осоишта ба ҳар як сокини кишвар аз номи тамоми соҳибкорони ҷавони кишвар номзади пешбаринамудаи Федератсияҳои иттифоқҳои касабаи мустақили Тоҷикистон, Иттифоқи ҷавонони Тоҷикистон ва Ҳизби халқии демократии Тоҷикистон Пешвои миллат муҳтарам Эмомалӣ Раҳмонро барои иштирок дар интихоботи дарпешистода ҳамчун номзади арзанда дастгирӣ намуданд.

Дар охири ҳамоиш изҳороти соҳибкорони муваффақи кишвар зери шиори “Интихоби мо-Пешвои мо” аз ҷониби Қурбонов Фирӯз Абдураҳимович, директори Корхонаи воҳиди давлатии “Клуби соҳибкорони ҷавон”-и назди Кумитаи кор бо ҷавонон ва варзиши назди Ҳукумати Ҷумҳурии Тоҷикистон қироат гардид.