13 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Остона дар Ҳамоиши шашуми Машварати ҳамкорӣ ва тадбирҳои боварӣ дар Осиё, ки таҳти раёсати Ҷумҳурии Қазоқистон бургузор гардид, иштирок ва суханронӣ карданд.

Хабар медиҳад сомонаи Маркази матбуоти Президенти Ҷумҳурии Тоҷикистон.

Бино ба иттилои манбаъ, Президенти Ҷумҳурии Тоҷикистон муҳтарам Эмомалӣ Раҳмон дар ҳамоиши мазкур оид ба таҳаввулоти амиқ дар арсаи ҷаҳон, оқибатҳои пандемияи КОВИД-19, таъсири он ба иқтисод ва амнияти кишварҳо, буҳрони иқтисодию иҷтимоӣ ва вазъи амнияти байналмилалию минтақавӣ, афзоиши терроризм, ифротгароӣ, ҷиноятҳои муташаккили фаромиллӣ, қочоқи маводи мухаддир ва ҷиноятҳои киберӣ андешаронӣ карда, талошҳои муштарак дар мубориза бо ин чолишҳо ва таҳдидҳо, инчунин ҳамоҳангсозии корҳоро ҷиҳати таҳкими сулҳу субот ва амният зарур шумурданд.

Президенти кишвар таъкид намуданд, ки Тоҷикистон дар асоси таҷрибаи андӯхтаи худ дар самти мубориза бо хатару таҳдидҳои ҷаҳонӣ Стратегияи нави мубориза бо терроризм ва ифротгароиро барои давраи то соли 2025 таҳия ва қабул намуд.

Бо ёдоварӣ аз ташаббусҳои ҷаҳонии Тоҷикистон дар мубориза бо таҳдиду хатарҳои ҷаҳони муосир Сарвари давлат таъкид намуданд, ки чанд рӯз пас дар пойтахти Тоҷикистон дар якҷоягӣ бо Созмони Милали Муттаҳид ва дигар шарикони байналмилалӣ Конфронси сатҳи баланд дар чаҳорчӯби “Раванди Душанбе” оид ба мубориза бо терроризм доир мегардад, ки мавзӯъҳои муҳими ҷаҳонро дар бар мегирад.

Мавриди зикр аст, ки пас аз шомил шудан ба Машварати ҳамкорӣ ва тадбирҳои боварӣ дар Осиё Тоҷикистон дар ноил шудан ба ҳадафҳо дар доираи Машварат саҳми арзанда мегузорад.