Тавре иттилоъ доред, 22 майи соли равон раъйпурсӣ барои ворид кардани тағйиру иловаҳо ба Конститутсияи мамлакат баргузор мешавад. Азбаски ҷавонон дар Тоҷикистон беш аз 70 фисадро ташкил медиҳанд, иштироки фаъоли онҳо дар ин маъракаи муҳими сиёсӣ нақши асосӣ дорад. Бинобар ин, аз мусоҳибон пурсидем:
Тағйиру иловаҳо ба Конститутсияро чӣ гуна дарёфтед?

Ш. Кенҷаев, декани факултети ҳуқуқшиносии ДДҲБСТ:
- Зарурияти ворид намудани тағйиру иловаҳо ба Конститутсия баҳри рушди босубот ва устувори ҷомеа равона гардидааст. Нақши тағийру иловаҳо ба Конститутсия баҳри ҳимояи асосҳои сохтори конститутсионии Тоҷикистон, яъне соҳибихтиёрӣ, ҳуқуқбунёд, дунявӣ, ягонагӣ ва ҳамчун давлати иҷтимоӣ мавқеи муҳимро доро мебошад.
Яке аз хусусиятҳои тағийру иловаҳо ба Коноститутсия ба хотири дастгирии ҷавонон равона гардидааст, ки минбаъд дар вазифаҳои хизматчии давлатӣ ҷавонони лаёқатманди 30-сола имконияти кору фаъолият карданро пайдо менамоянд. Ин хусусият дар Паёми имсолаи Пешвои миллат, муҳтарам Эмомалӣ Раҳмон чунин омадааст: «Ҳукумат ҷиҳати таъмини пояҳои моддиву техникии муассисаҳои илмӣ, бо таҷҳизоти муосир муҷаҳҳаз гардонидани озмоишҳо, инчунин тайёр кардани кадрҳои илмӣ аз ҳисоби ҷавонони лаёқатманд чораҳои мушаххас меандешад».
Дигар паҳлуи муҳими тағийру иловаҳои пешниҳодшуда масъалаи баланд бардоштани сатҳи зиндагии мардум, рушди минбаъдаи равандҳои демократикунонии ҷомеа, ҳуқуқу озодиҳои инсону шаҳрванд ва риояву кафолати онҳо мебошад.
Ҷумҳурии Тоҷикистон ҳамчун давлати мустақил низоми ҳуқуқии худро доро мебошад, ки дар он конститутсия мавқеи асосиро ишғол намуда, ба ҳаёти давлативу ҷамъиятӣ таъсир мерасонад.

Миралиён Қиёмиддин, вакили МН МО ҶТ:
- Таҳкими ҳуқуқҳои конститутсионии ҷавонон – рӯ овардан ба ҷавонон ва фароҳам овардани шароит барои иштироки онҳо дар идораи ҳокимияти давлатӣ, бахсус роҳбарӣ ва ишғоли мансабҳои сиёсӣ айни муддао ва тақозои ҷомеаи муосир арзёбӣ мегардад. Зеро бо ин далелнокӣ метавон ҳавасмандӣ ва завқмандии насли ҷавонро дар хизмат ва идоракунии давлатӣ баланд бардошт, зеро қудрат ва нерӯи тоза, тобовару устувор ва навовари онҳоро дар рушду нумуи ҷомеа ва давлат бомаром истифода бурд.
Боиси зикр аст, ки заминаҳои конститутсионии татбиқи босамари сиёсати давлатии ҷавонон ва имкониятҳо барои ҷавонон дар идораи давлатӣ дар таҷрибаи кишварҳои Белорус, Арманистон ва Молдова оварда шудааст.
Бо ин мақсад, ворид намудани тағйиру иловаҳо ба Конститутсияи Тоҷикистон вобаста ба поён овардани сарҳадоти синнусолӣ, яъне васеъ гардонидани имконоти ҷавонон барои ишғоли мансабҳои олӣ-сиёсии хизмати давлатӣ боиси дасгирии ҳамаҷониба мебошад.