Моҳи сентябри соли 2015 ҷаласаи 70-уми Ассамблеяи Генералии Созмони Милали Муттаҳид тарҳи 17 ҳадафро, ки омили таъмини боэътимоди рушди устувор дар саросари ҷаҳон маҳсуб мешавад, ҳамчун Ҳадафҳои рушди устувор қабул намуд ва давлатҳо - аъзои созмон уҳдадор шуданд, ки дар ин замина, ҳадафҳои худро таҳия намоянд.

Ҳукумати Ҷумҳурии Тоҷикистон низ ҳадафҳои худро дар Стратегияи миллии рушди Ҷумҳурии Тоҷикистон то соли 2030 таҳия намуда, дар ин замина, Барномаи миёнамуҳлати рушди Ҷумҳурии Тоҷикистон барои солҳои 2016-2020-ро ба тасвиб расонд ва ҳоло он мавриди амал қарор дорад. Аз 232 шохиси вобаста ба вазифаҳои Ҳадафҳои Рушди Устувор, ки расман қабул шудааст, Тоҷикистон 202 - тоашро пазируфтаву дар ҳоли коркард қарор додааст. Вобаста ба ин, аз ҷониби Президенти Ҷумҳурии Тоҷикистон муҳтарам Эмомалӣ Раҳмон низ тавсияҳои судманд дода шудаанд.

Ҳадафи 16-уми Ҳадафҳои рушди устувор - ин “Мусоидат ба ташаккули ҷомеаи осоишта ва кушода барои рушди устувор, таъмини дастрасӣ ба адолат барои ҳама ва бунёди муассисаҳои самаранок, ҳисоботдиҳанда ва дар иштироки васеъ асосёфта дар ҳама сатҳ” номгузорӣ шуда, дар навбати аввал ба таври назаррас кам кардани тамоми шаклҳои зӯровариро пешбинӣ менамояд.

25-26 ноябри соли равон дар Вазорати адлияи Ҷумҳурии Тоҷикистон дар доираи лоиҳаи “Дастгирии маҷмӯи ташкилотҳои ҷамъияти шаҳрвандӣ, ки барои устувор ва беҳтар намудани ҳамкориҳо ва ҳамоҳангсозиҳо аз рӯи муқовимат дар бахши волоияти қонун”, ки аз ҷониби Барномаи Рушди Созмони Милали Муттаҳид таҳия шудааст, бо ташаббуси Лигаи занони ҳуқуқшиноси Ҷумҳурии Тоҷикистон ва Вазорати адлияи Ҷумҳурии Тоҷикистон бо иштироки гурӯҳҳои корӣ доир ба татбиқшавии Ҳадафи 16-ум дар мавзӯи “Иштироки ҷомеаи шаҳрвандӣ дар таҳқиқот ва ҳисобот оид ба татбиқи лоиҳаи “Ҳадафи рушди устувор” вохӯрӣ гузаронида шуд. Дар он гуфта шуд, ки афзалияти асосии давлат, дар баробари дигар мақсадҳои стратегӣ, додани диққати асосӣ ба имкониятҳои баробар барои татбиқнамоии иқтидори инсонӣ дар асоси баробарҳуқуқӣ, адолат ва эҳтироми шаъну шарафи инсон ба ҳисоб меравад.

Тавре сардори раёсати рушди минтақаҳо ва мониторинги барномаҳои миллии Вазорати рушди иқтисод ва савдои Ҷумҳурии Тоҷикистон Султоншо Ҳомидов қайд мекунад, танҳо сатҳи волоияти қонун нишон медиҳад, ки рафтори одамон то ба кадом андоза таҳти таъсири муҳити ҳуқуқӣ қарор дорад. Ба андешаи ӯ, ҷараёни ин нишондиҳандаҳо дар Тоҷикистон дар солҳои охир аз мавҷудияти баъзе пешравиҳо шаҳодат медиҳад, вале айни ҳол, хело суст ва нигаронкунанда мебошанд. - Бо дарназардошти ин, дар айни замон, зарурати ҳамгироии ҳадафи 16 бо тамоми ташаббусҳои ҳуқуқӣ ва ислоҳот дар давлат ба вуҷуд омадааст,- изҳор дошт, С. Ҳомидов.

Лозим ба ёдоварист, ки расидан ба Ҳадафҳои Рушди Устувор ноилшавӣ ба рушди кишвар аст. Мувофиқи маълумоти Вазорати адлия айни ҳол, дар заминаи мақоми ҳамоҳангсоз гурӯҳҳои кории доимоамалкунанда барои муҳокима, мониторинг, ошкорнамоии камбудиҳову душвориҳо, муайяннамоии афзалият, инчунин, таҳияи индикаторҳои миллӣ оид ба ҳадафи 16 таъсис дода шудааст. Ба гурӯҳи корӣ бошад, намояндагони 14 сохтори давлатӣ ва ҷомеаи шаҳрвандӣ ворид гардидаанд. Инчунин ба ғайр аз гурӯҳҳои корӣ шабакаи ташкилотҳои ҷамъиятӣ низ таъсис дода шуда аст.

Айни замон, шабакаи ташкилотҳои ҷамъиятии таъсисдодашуда оид ба волоияти қонун ва дастрасӣ ба адолати судӣ низ доир ба пиёда сохтани ҳадафи 16 амал менамоянд. Дар он шабака ташкилотҳо аз тамоми минтақаҳои кишвар фаро гирифта шудаанд, ки миқдори умумии онҳо ба 22 адад мерасад.

Мушовири миллӣ оид ба дастгирии гурӯҳҳои кории байниидоравии Шӯрои миллии рушди назди Президенти Ҷумҳурии Тоҷикистон Хурсандмурод Ҳакимов изҳор дошт, Ҳукумати кишвар барои ноилшавӣ ба ҳадафҳое саъй мекунад, ки барои рушди кишвар заруранд. Бо ин ҳама, метавон хулосабарорӣ кард, ки бо пиёда гардидани кулли аҳдофи 16 метавонем, як кишвари улгӯ ва намуна барои ҷомеаи ҷаҳонӣ бошем.