Раиси Маркази тадқиқоти стратегии назди Президенти Ҷумҳурии Тоҷикистон Хайриддин Усмонзода гуфт, ҳалли масъалаи марзии Тоҷикистону Қирғизистон умедворкунанда аст. Ӯ ин нуктаро 8-уми феврал зимни нишасти хабарӣ баён кард.

- Комиссияи ҳукуматие, ки аз ду ҷониб кор карда истодаанд, умедворкунанда бар он аст, ки роҳи муносиби мусолиҳатомези ин масъала ба даст оварда мешавад, - гуфт Усмонзода.

Ӯ инчунин гуфт, ки дар ин маврид ба муносибати 30-солагии барқарории муносибатҳои дипломатии Ҷумҳурии Тоҷикистон ва Қирғизистон сарони ду кишвар гуфтугӯи телефонӣ доштанд ва дар ин гуфтугӯ ҳарду ҷониб ин масъаларо ба миён гузоштанд.

- Ҳарду ҷониб дар шакли гуфтушунид ҳалли баҳси марзиро ба миён гузоштанд ва тавофуқ дар ин маврид ҳосил шудааст, - зикр кард номбурда.

Усмонзода инчунин илова намуд, ки ҳар қадар изҳоротҳои хушбинона аз ҷониби кишвари ҳамсоя, яъне Қирғизистон зиёд бошад, ҳамон қадар ба манфиати роҳи ҳалли масъала аст.

- Музокирот имрӯзҳо дар байни гурӯҳҳои корӣ идома дорад ва пешравиҳо дар заминаи ин гуфтушунидҳо аллакай мавҷуд аст. Инро метавонем, ки ҳамчун як дастоварди фаъолияти ин комиссияҳои байниҳукуматӣ ҳисоб кунем ва аслан ҳарду кишвар бидуни ягон гурӯҳи сеюм омода ҳастанд, ки ин масъаларо ҳаллу фасл намоянд, - гуфт Х. Усмонзода.