Дар нимсолаи аввали соли ҷорӣ Хадамоти гумрук ва воҳидҳои сохтори он дар самти мубориза бар зидди ҳуқуқвайронкуниҳои гумрукӣ 1943 ҳолати ҳуқуқвайронкуниҳои гумрукиро ба қайд гирифтаанд, ки нисбат ба ҳамин давраи соли гузашта 444 ҳолат зиёд мебошад. Аз ҳисоби умумии ҳуқуқвайронкуниҳо, 31 ҳолат ба ошкори ҷиноят мансуб мебошад.

Дар ин бора Азим Турсунзода, муовини якуми сардори Хадамоти гумруки назди Ҳукумати Ҷумҳурии Тоҷикистон 7-уми август зимни нишасти матбуотии ин ниҳод қайд кард.

- Аз ҷумла, парвандаҳои ҷиноятӣ бо моддаи 289 (қочоқ) 13 ҳолат, бо моддаи 200 (муомилоти ғайриқонунии воситаҳои нашъадор) 1 ҳолат, бо моддаи 340 қисми 1 (сохтакорӣ) 9 ҳолат, бо моддаи 209 қисми 1 (истеҳсол, нигоҳ доштан, интиқол ё ба соҳибияти каси дигар додани мол ва маҳсулот, ичрои кор ё хизматрасоние, ки ба талаботи бехатарӣ ҷавоб намедиҳад) 4 ҳолат, бо моддаи 210 иловаи 1 (ғайриқонунӣ ба муомилот баровардани дорувории бесифат) 1 ҳолат, бо моддаи 259 иловаи 1 (истеҳсол, ба даст овардан, нигоҳдорӣ, ҳамлу нақл ё ба муомилот баровардани мол ва маҳсулоти тамғаношуда) 1 ҳолат ва бо моддаи 284 (бастани аҳди ғайриқонунӣ бо металҳои қиматбаҳо) 2 ҳолат ба қайд гирифта шудаанд, - гуфт Азим Турсунзода.

Номбурда ҳамчунин қайд кард, ки парвандаҳои ҳуқуқвайронкунии маъмурӣ 1912 (дар нимсолаи якуми соли 2023 - 1469) ададро ташкил кард, ки аз ин ҳисоб 1807 парванда баррасӣ гардид. Инчунин, 105 парванда дар марҳилаи баррасӣ қарор дошта, аз шумораи умумии парвандаҳо 247 адад аз рӯи тобеият барои баррасӣ ба мақомоти судӣ ирсол гардидаанд.