Дар мусобиқаи байналмилалӣ ба хотираи қаҳрамони Иттиҳоди Шӯравӣ Д. Шопоков муштзанҳои мо соҳиби 4 медал шуданд.

Мусобиқаи мазкур 20-24 феврал дар шаҳри Бишкеки Ҷумҳурии Қирғизистон доир гардид.

Ба иттилои сомонаи расмии Кумитаи миллии олимпии кишвар медалҳои тиллои дастаи мунтахаби Ҷумҳурии Тоҷикистонро Шоира Зулқайнарова дар вазни 64 кило миёни бонувон пас аз ғалаба бар намояндаи Тайланд С. Судапарн ва Баҳодур Усомнов дар вазни 63 кило миёни мардҳо пас аз пирӯзӣ бар варзишгари Белорус Дмитрий Асанов ба даст оварданд. Идимоҳ Холова дар вазни 69 кило миёни бонувон дар финал аз Шаҳноза Юнусоваи узбекистонӣ мағлуб шуда, медали нуқра ба гардан овехт. Сиёвуш Зуҳуров дар вазни +91кило миёни мардҳо соҳиби медали биринҷӣ шуд. 

Дастаи мунтахаби Тоҷикистон дар мусобиқаи мазкур дар ҳайати 10 варзишгар иштирок карданд. 
Дар 42-юм мусобиқаи байналмилалии бокс ба хотираи қаҳрамони Иттиҳоди Шӯравӣ Дуйшонқул Шопоков, 199 варзишгар аз кишварҳои Белорус, Қазоқистон, Қирғизистон, Муғулистон, Руссия, Тайланд, Тоҷикистон ва Муғулистон барои 13 маҷмуи медалҳо мубориза бурданд.