-Дар натиҷаи андешидани чораҳои зарурӣ, ки аз ҷониби мақомоту кумитаҳои дахлдори кишвар амалӣ шуда буд, аз 3747 нафар шаҳрвандоне, ки солҳои гуногун дар муассисаҳои таълимии динии хориҷ аз кишвар таҳсил мекарданд, 3463 нафарашон ба ватан баргардонида шудаанд, ки ин ба 92,4 фисади онҳо баробар аст. Теъдоди ин нафарон дар нимсолаи аввали соли 2018 35 ададро ташкил медиҳад.

Ин нуктаро Сулаймон Давлатзода, раиси Кумитаи оид ба корҳои дин, танзими анъана ва ҷашну маросимҳои миллӣ зимни нишасти хабарӣ ба хабарнигорон иброз доштанд. Ҳамчунин роҳбари ин ниҳод қайд карданд, ки аз ин шумора 126 нафар дар муассисаҳои оливу миёна ва миёнаи касбии кишвар ба таҳсил фаро гирифта шудаанд ва мутаассифона 73 нафари онҳо бо роҳҳои гуногун ба ҷойёҳои таҳсили пешинаи худ баргаштаанд.

Раиси Кумита баргардонидани ҷавононро аз ин кишварҳо амри зарур ва саривақтӣ хонда гуфт: “Дар бештари он кишварҳое, ки ҷавонони мо аз онҷо баргардонида шудаанд, имрӯзҳо нооромиҳои сиёсӣ ба назар мерасанд ва дар он кишварҳо таъмини амнияти мардум аслан кафолат дода намешавад. Яъне агар ҳамин дастури саривақтӣ барои баргардонидани ҷавонон намебуд, тақдири ҳудуди 4000 ҷавонони тоҷик норавшан боқӣ мемонд”.

Дилангез БАЙҚАРАЕВА, коромӯзи “ҶТ”