-Мутобиқи маълумоти расмии оморӣ дар моҳои январ-июни соли 2019 ҳаҷми Маҷмӯи маҳсулоти дохилӣ ба 31 270,9 млн. сомонӣ ва суръати афзоиши он ба 7,5 фоиз баробар гардид, - гуфт Қаҳорзода Файзиддин, вазири молияи кишвар, 2 август зимни нишасти хабарӣ.

Номбурда дар идома афзуд, нишондиҳандаҳои мазкур нисбат ба ҳамин давраи соли 2018 муносибатан 3 583,8 млн.сомонӣ ва 0,3 банди фоизӣ зиёд мебошад. Рушди иқтисоди кишвар дар ин давра асосан аз ҳисоби 12,5 фоиз зиёд гардидани ҳаҷми истеҳсоли маҳсули саноатӣ, 10,8 фоиз соҳаи кишоварзӣ, 9,4 фоиз гардиши савдо, аз ҷумла гардиши моли чакана 9, 6 фоиз таъмин шудааст.

Вобаста ба гардиши савдои хориҷӣ гуфта шуд, ки дар давраи ҳисоботӣ ҳаҷми гардиши савдои хориҷӣ ба 2 136,9 млн. доллари ИМА баробар гардид, ки дар қиёс бо ҳамин давраи соли гузашта 77,9 млн. доллари ИМА  ё 3,8 фоиз зиёд мебошад. Аз ҷумҳурӣ ба маблағи 570,6 млн. доллари амрикоӣ молу маҳсулот содирот карда шудааст ва ҳиссаи он дар гардиши савдои хориҷӣ 26,7 фоизро ташкил менамояд. Ҳамзамон, дар ин давра ба ҷумҳурӣ ба маблағи 1 556,3 млн. доллари амрикоӣ молу маҳсулот ворид карда шудааст, ки нисбат ба ҳамин давраи соли гузашта 35,3 млн. доллари амрикоӣ ё ба андозаи 2,3 фоиз зиёд мебошад. Ҳиссаи воридот дар гардиши савдои хориҷӣ 73,3 фоизро ташкил медиҳад.

Гулрӯ КАЛБОДОВА, волонтёри “ҶТ”