Имрӯз 26 апрел, дар Китобхонаи миллии Тоҷикистон аввалин Анҷумани кардиологҳо ва терапевтони кишварҳои Осиё ва Иттиҳоди Давлатҳои Мустақил дар Ҷумҳурии Тоҷикистон таҳти унвони “Масъалаҳои мубрами бемориҳои дилу рагҳо ва соматикӣ” баргузор гардид.

Дар кори анҷуман зиёда аз 450 нафар намояндагон, аз ҷумла 70 нафар мутахассисони варзидаи риштаи кардиологӣ, кардиоҷарроҳӣ ва терапевтӣ аз давлатҳои хориҷӣ иштирок намуданд. 

Олимзода Насим Хоҷа, вазири тандурустӣ ва ҳифзи иҷтимоии аҳолии Ҷумҳурии Тоҷикистон, анҷуманро ифтитоҳ бахшида, нақши онро дар пешрафти соҳаи тиб муҳим арзёбӣ намуд.
 
Дар анҷумани мазкур масъалаҳои калидии соҳа, ба монанди ҳолат ва имконияти рушди хадамоти кардиологӣ ва терапевтӣ, тибби баландкӯҳ: хусусиятҳои ташхис ва табобат дар шароитҳои гипоксияи баландӣ ва таъсири касалиовари фавқулодавӣ дар ҳолати бемориҳои дилу рагҳо ва ҷисмонӣ, ёрии таъҷилӣ ва фавқулодаи ҳолатҳои буҳронӣ, ки ба бемориҳои кардиологӣ ва ҷисмонӣ вобастагӣ доранд, баррасӣ шуданд. Ҳамзамон, мавзуъҳои технологияҳои тиббии ҳозиразамон дар ташхис ва табобати беморони кардиологӣ, кардиологияи интервентсионӣ ва ҷарроҳии дилу рагӣ, мушкилоти тибби асри XXI: аломати мубодилавӣ, касалии қанд ва бемориҳои ҳамсон мавриди таҳлили мутахассисони соҳа қарор гирифтанд.
 
Зимни баромадҳо таъкид гардид, ки соҳаи ҷарроҳии дилу рагҳои хунгард дар Тоҷикистон ба муваффақиятҳои назаррас ноил гардидааст. Чунончи, бартараф намудани нуқсонҳои мураккаб бо роҳи ҷарроҳӣ ба монанди: тетрадаи фалло, ҳангоми декстракардия, корректсияи пурраи баромади якҷояи рагҳои магистралӣ аз меъдачаи рост, иҷроиши амалиёти Мастард ба беморони гирифтори нуқсонҳои модарзодии намуди вазнин, гузоштани анастомози кавопулмоналии дусамта, амалиёти ҷарроҳии Мюллер ба кӯдаки 36 рӯза, меъдачаи ягона, транспозитсияи рагҳои магистралӣ, аномалияи Эбштейн бо натиҷаҳои хуб ба иҷро расиданд.

Масъулини Вазорати тандурустӣ ва ҳифзи иҷтимоии аҳолии Ҷумҳурии Тоҷикистон иброз доштанд, ки Маркази ҷумҳуриявии клиникии бемориҳои дил низ яке аз муассисаи муваффақи соҳавӣ дар Тоҷикистон ба шумор рафта, соли 2011 бахши “Шараён Варид” ифтитоҳ гардид ва бо ташхису табобати муосири бемориҳои дилу раг фаъолият дорад. Айни замон ангиографияи шараёнҳои гардан, системаи асаби марказӣ (интракраниалӣ) ва шараёнҳои гурда, ангиография ва стентгузории шараёнҳои пой ба таври васеъ ба роҳ монда шудааст. Нақши асосиро дар инкишофи ёрии терапевтии аҳолӣ назорати махсуси тибби ҷамъиятӣ мебозад, ки кори ҷиддии методикию экспертӣ ва омӯзиширо дар бар гирифта, ҳаракати фаъоли донишҳои ҳозиразамонро дар таҷрибаи тандурустӣ иҷро мекунад.

Ёдовар мешавем, аввалин Анҷумани кардиологҳо ва терапевтони кишварҳои Осиё ва Иттиҳоди Давлатҳои Мустақил дар Ҷумҳурии Тоҷикистон таҳти унвони “Масъалаҳои  мубрами бемориҳои дилу рагҳо ва соматикӣ” дӯ рӯз, 26-27 апрел идома меёбад.