Дар шаҳри Бохтари вилояти Хатлон дар вохӯрӣ бо интихобкунандагон барномаҳои пешазинтихоботии номзадҳо ба мансаби Президенти Ҷумҳурии Тоҷикистон аз Ҳизби Аграрии Тоҷикистон, Ҳизби Сотсиалистии Тоҷикистон, Иттифоқи касабаи мустақили Тоҷикистон, Иттифоқи ҷавонони Тоҷикистон, Ҳизби Халқии Демократии Тоҷикистон, Ҳизби Ислоҳоти Иқтисодии Тоҷикистон ва Ҳизби Коммунистии Тоҷикистон муаррифӣ карда шуд.

Барномаҳои пешазинтихоботии номзадҳо ба мансаби Президенти Ҷумҳурии Тоҷикистон, ки бо назардошти дурнамои ҳафт соли оянда таҳия шудаанд, дар онҳо заминаҳои рушди минбаъдаи соҳаҳои афзалиятдоштаи мамлакат, аз ҷумла саноат, кишоварзӣ, энергетика, нақлиёт, илм, маориф, фарҳанг, тандурустӣ ва бахшҳои дигар нишон дода шудааст.

Дар Барномаи пешазинтихоботии номзад ба мансаби Президенти Ҷумҳурии Тоҷикистон аз Иттифоқҳои касабаи мустақили Тоҷикистон, Иттифоқи ҷавонони Тоҷикистон ва Ҳизби Халқии Демократии Тоҷикистон Эмомалӣ Раҳмон, ки аз ҷониби шахси боэътимод-муовини якуми раиси Ҳизби Халқии Демократии Тоҷикистон Абдуҷаббор Азизӣ муаррифӣ карда шуд, таъмини рушди устувори иқтисоди миллӣ, бунёди корхонаҳои истеҳсолии нав бо ҷалби бахши хусусӣ дар доираи татбиқи ҳадафи чоруми миллӣ - саноатикунонии босуръати мамлакат, ба роҳ мондани истеҳсоли маҳсулоти ба рақобат тобовар ва ба содирот нигаронидашуда аз ҳадафҳои асосӣ ба ҳисоб меравад. Дар барномаи пешазинтихоботии номзад рушди иқтисоди мамлакат бо назардошти дурнамои ҳафт соли оянда махсус таъкид гардидааст.

Номзад ба мансаби Президенти Ҷумҳурии Тоҷикистон аз Ҳизби Аграрии Тоҷикистон Рустам Латифзода таъкид намуд, ки боз ҳам баланд бардоштани мавқеи бахши аграрӣ дар таъмини амнияти озуқавории мамлакат, ташкили кластерҳои агросаноатӣ, хизматрасонӣ дар бахши бозорёбӣ, ташаккул ва дастгирии брендҳои маҳаллии маҳсулоти кишоварзӣ ва дастгирии истеҳсолоти хоҷагиҳои ёрирасони аҳолӣ дар меҳвари барномаи пешазинтихоботиаш қарор дорад.

Номзад ба мансаби Президенти Ҷумҳурии Тоҷикистон аз Ҳизби Сотсиалистии Тоҷикистон Абдуҳалим Ғаффорзода дар вохӯрӣ бо итихобкунандагони шаҳри Бохтар таъкид кард, ки “бо истифодаи сиёсати дурусти андоз, мо метавонем, ҳаёти иҷтимоии мардуми камбизоат, нафақаҳўрон, донишҷўён, маъюбон, занон ва дар маҷмӯъ тамоми табақаи ҷомеаро беҳтар гардонем”.

Номзад ба мансаби Президенти Ҷумҳурии Тоҷикистон аз Ҳизби ислоҳоти иқтисодии Тоҷикистон Рустам Раҳматзода дурнамо ва самтҳои таҳкими вазъи иҷтимоӣ, иқтисодӣ ва сиёсии кишвар, ки дар барномаи пешазинтихоботиаш дарҷ ёфтааст, ба интихобкунандагон пешниҳод намуд. Ба таъкиди номзад, Барномаи Ҳизби ислоҳоти иқтисодии Тоҷикистон дигаргунсозии иқтисоди кишвар ва созмон ёфтани ҷомеаи шаҳрвандиро дар Тоҷикистон пайгирӣ мекунад.

Мироҷ Абдуллоев номзад ба мансаби Президенти Ҷумҳурии Тоҷикистон аз Ҳизби Коммунистии Тоҷикистон дар барномаи пешазинтихоботии худ диққати асосиро ба ҳамоҳангсозии сатҳи рушди иқтисодӣ ва иҷтимоии минтақаҳои кишвар, беҳтар кардани инфрасохтори деҳот, назорати фаъолияти ташкилотҳои молиявӣ, пайгирии хароҷоти захираҳои моддӣ ва рушди иқтисодӣ равона намудааст.

Номзадҳо ба мансаби Президенти Ҷумҳурии Тоҷикистон дар дигар шаҳру ноҳияҳои вилояти Хатлон низ бо мақсади муаррифии барномаҳои пешазинтихоботии худ бо интихобкунандагон вохӯрӣ анҷом медиҳанд.

Ёдовар мешавем, ки интихоботи Президенти Ҷумҳурии Тоҷикистон 11-уми октябри соли 2020 таъин гардидааст.