ҶОМЕА
Душанбе 17 Июн 2024 01:11
3738
Душанбе шаҳри калонтарини ҷумҳурӣ, маркази илму фарҳанг ва пойтахти Тоҷикистон аст. Ин шаҳри зебову дилоро таърихи худро дорад. Баъди инқилоб, яъне, соли 1924 дар Осиёи Миёна тақсимоти миллии марзӣ сурат гирифт, миллатҳои минтақа ба давлатҳои хурди миллӣ тақсим гаштанд. Аз ҷумла тоҷикон низ пойтахти давлати худро аз Бухоро ба Душанбе оварда, онро маркази Тоҷикистон эълон доштанд.

Оҳиста-оҳиста аз як шаҳри ҷангзадаю харобшуда Душанбе симои худро дигар карда, тадриҷан ба шаҳри бузург мубаддал гашт. Пойтахти тоҷикон қомат афрохта, қабои рангин ба бар кард. Хонаҳои серошёна, қасру толорҳои барҳаво, театр, биноҳои маъмурию фарҳангӣ сохта шуданд, ки ҳусни онро боз ҳам зеботар намуд. Имрӯз шаҳри Душанбе маркази сиёсӣ, фарҳангӣ ва иқтисодии ҷумҳурӣ мебошад. Дар ин шаҳри зебоманзар намояндагони миллатҳои мухталиф дӯстона зиндагӣ доранд. Онҳо аллакай ба расму русуми тоҷикона мутобиқ гашта, дар чорабиниҳои миллӣ, мисли Наврӯз ва Сада фаъолона иштирок менамоянд.

Душанбе дар давоми 26 соли Истиқлолияти давлатӣ маҳз бо заҳмату талош ва ҷонбозиҳои фарзанди фарзонаи миллати тоҷик, муҳтарам Эмомалӣ Раҳмон ва роҳбарияти тозаинтихоби пойтахтамон Рустами Эмомалӣ мақоми шоиста касб карда, ба ҷаҳониён ҳамчун шаҳри сулҳу дӯстӣ муаррифӣ гаштааст.

Миллати тоҷик дар тӯли таърихи худ шаҳру пойтахтҳое бунёд кардааст, ки мавриди таваҷҷуҳи оламиён будаанд. Суннатҳои шаҳрдорӣ ва санъати меъмории онҳо, ки хусусиятхои миллӣ ва умумибашарӣ доранд, то замони мо боқӣ мондааст.

Дар асоси дастуру супоришҳои Пешвои миллат, муҳтарам Эмомалӣ Раҳмон ба муносибати 26-умин солгарди Истиқлолияти давлатии Тоҷикистон бо иштироки Раиси шаҳри Душанбе Рустами Эмомалӣ пули роҳи оҳан ва автомобилгард, воқеъ дар ноҳияи Шоҳмансур пас аз навсозӣ ва гулгашти назди истгоҳи Роҳи оҳан то Маҷмааи меъмории муҷассамаи Садриддин Айнӣ, воқеъ дар хиёбони Рӯдакӣ расман мавриди баҳрабардорӣ қарор гирифтанд.

Гулгашти назди истгоҳи Роҳи оҳан, фаввораҳои ҳаракаткунандаи мусиқавӣ бо таҷҳизоти равшанидиҳанда сохта шудаанд, ки таваҷҷуҳи ҳар бинандаро ба худ ҷалб менамояд. Дар гулгашти мазкур барои 650 нафар ҷои нишаст омода гашта, 40 баландгӯяк, ки ба хати радиоӣ пайваст мебошанд, ба истироҳаткунандагон хизмат мерасонанд.

Дар вақти сафари кориам аз фурсати муносиб истифода бурда, шаҳри Душанберо сайру гашт кардам ва ба навор гирифтам. Дар ҳақиқат, пойтахти кишварамон Душанбешаҳр ба як макони диданиву хеле назаррабо табдил ёфтааст. Бояд дигар роҳбарони шаҳру ноҳияҳои мамлакат ҳам мисли роҳбарияти пойтахт бо фикру ақида ва идеяҳои нави ободкорию бунёдкорӣ дар шаҳру ноҳияҳои хеш кору фаъолият намоянд, то ба ин васила Тоҷикистон боз ҳам зеботару рангинтар шавад ва пурра ба кишвари саёҳату истироҳат табдил ёбад.

Шарифхон ТИЛЛОЕВ, рӯзноманигор

Эзоҳи худро нависед



Рамзҳо дар расм