Ҳамаи мо вазифадорем, ки ба шукронаи соҳибдавлативу соҳибихтиёрӣ мардуми шарифу заҳматпеша ва ободкору фарҳангсолори тоҷикро дар роҳи бунёдкориву созандагии Ватани маҳбубамон - Тоҷикистон ва боз ҳам ободу зебо гардондани сарзамини аҷдодиамон сарвариву раҳнамоӣ кунем.

Эмомалӣ РАҲМОН

Ваҳдат шаҳри нуру сафо, шаҳри дилорои мардуми саодатёр ва мехнатқаринест, ки тули солҳои охир рушду нумуъ ёфта, ба яке аз гӯшаҳои ободу зеботарини Тоҷикистони азиз мубаддал гардидааст.

Ташрифи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба дараи хушманзараи Ромити шаҳри Ваҳдат нуру сафо овард. Вохӯрии Сарвари давлат бо аҳли зиё, эҷодкорону ҷавонони соҳибистеъдод ва мардуми минтақаи Ромит дар хавои кушод баргузор гардид.

Яке аз иштирокчиёни ин вохӯрӣ хатмкардаи муассисаи давлатии Гимназияи хонандагони лаёқатманди ба номи Абулфазли Балъамӣ Фарзона Ҳалимова буд. Сараввал, Фарзона бо ҳисси баланди ватандӯстӣ дар назди Пешвои миллат баромад намуда, дар бораи пешравиҳои худ ва сазовори номи баланди донишҷӯ шуданаш маълумот дод.

“Салому дуруди пур аз меҳру муҳаббат ба Шумо, Пешвои миллат, хуш омадед, ба Ваҳдатдиёри хушбоду ҳавои нозанин.
Ман Ҳалимова Фарзона ин лаҳза, аз ин минбар дар ҳузури мубораки шумо-Пешвои миллат гуфтаниям, ман яке аз хушбахттарин фарди сайёра ҳастам, чунки Ватани осудаю обод, хотири шод дорам ва болотар аз ин, Сарвари худодод дорам. Сарваре, ки ҳастии хешро баҳри рушду тараққиёти давлаташ, хушбахтии миллаташ бахшидааст. Бо ҷасорату маҳорати адолатпешааш дили аҳли оламро ба даст овардааст.

Сарваре, ки хуршедосо ба ҳар зарра назар меандозаду дар вуҷудаш нуру гармӣ мебахшад. Ман низ яке аз он зарраҳоям. Аз файзи сиёсати хирадмандонаи шумо баҳравар шуда, дар ҷавоби ғамхории шумо ба омӯхтани илму ҳунар камар бастаам. Ман таҳсилгирандаи Гимназияи хонандагони лаёқатманди ба номи Абулфазли Балъамии шаҳри Ваҳдат ҳастам. Имсол гимназияро бо медали тилло хатм карда, ба Донишгоҳи давлатии тиббии Тоҷикистон ба номи Абӯали ибни Сино дохил шудам”, - иброз дошт Фарзона зимни баромади хеш.

Пешвои миллат ин суханонро шуниданду гуфтанд: “Аҳсан, духтарам, хон, вақте ки гимназияро бо медали тилло хатм карда бошӣ, дониши худро сайқал деҳ. Ояндаи Тоҷикистон дар дасти шумо барин ҷавонони босаводу болаёқат аст. Мо вазифадорем, ки ҷавононро дастгирӣ кунем, тарбия кунем, ки оянда Ватани худро соҳиб шаванд. Ба падару модарат раҳмат, барои тарбияи чунин фарзанд”.

Ҳоло Фарзона Ҳалимова донишҷӯӣ соли шашуми Донишгоҳи давлатии тиббии Тоҷикистон ба номи Абӯали ибни Сино мебошад.

Рушду инкишофи ҷомеаи имрӯзаро бе мактабу маориф ва устодони донишманд тасаввур намудан ғайриимкон аст. Дар ин росто Президенти мамлакат муҳтарам Эмомалӣ Раҳмон фармудааст: “Маориф асоси рушду тараққиёти ҳар як давлату миллат мебошад. Зеро рушду нумӯи ҷомеа, таъмини амнияти ҷомеаву давлат ва ноил шудан ба сатҳи ҷаҳонии иқтисод. Татбиқи техника ва технологияи муосир бевосита ба рушди соҳаи маориф, ташкили раванди бонизом ва босифати таълиму тарбияи хонандагону донишҷӯён, хулоса, ба сатҳи саводи миллат вобаста мебошад”.

Баромадкунандаи дигар дар ин вохӯрӣ омӯзгори ҷавон Холиқова Малоҳат буд. Чуноне ки ба ҳамагон маълум аст, Пешвои миллат аз рӯзҳои нахустин ба самти мактабу маориф таваҷҷуҳи хосса доранд. Ҳамеша пуштибони мактабу муаллим аст. Аз ин рӯ, ба суханронии омӯзгор Холиқова Малоҳат бодиққат гӯш карданд. Муаллима суханро чунин оғоз намуд: “Салом, муҳтарам Пешвои миллат. Ман Холиқова Малоҳат, омӯзгори синфҳои ибтидоии муассисаи таҳсилоти миёнаи умумии №3 мебошам. Соли дуюм аст, ки ба насли наврас сабақ меомӯзам. Ҳамчу омӯзгор миннатдории худро ба Шумо, Пешвои миллат, барои дастгирии ҷавонон, махсусан, кормандони соҳаи маориф мерасонам. Мо – ҷавонон ҷонибдори сиёсати пешгирифтаи шумоем”.

Пешвои миллат ба муаллима Холиқова Малоҳат низ барои кори пурмасъулаш, яъне тарбияи насли наврас аҳсан гуфта, таъкид карданд: “Раҳмат, ба падару модарат”.

Дар охир, муаллима Холиқова Малоҳат мисраъҳои зерини шоири ватансаро шодравон Мирзо Файзалиро чунин қироат кард:

Ба ин марди Худо аз ҷону дил шукрона бояд кард,
Дуои давлату ҷонаш ба ҳар як хона бояд кард.
Ҳама умр эътирофи хизматаш мардона бояд кард,
Ба роҳи сулҳ рафта, зиндагӣ аҳлона бояд кард.

Ҳар вақте Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сафари расмӣ ба ин ё он мамлакат мераванду дар ҷаласаҳои сатҳи баландтарин, минҷумла, Созмони Милали Муттаҳид, баромад менамоянд ва бо забони ноби модарӣ суханронӣ мекунанд, аз симои ориёиву виқори тоҷиконааш меболаму ифтихор мекунам ва чаро ҳам наболам, ки ӯ Пешвои миллати ману Сарвари давлати ман аст.

Марзия СУЛАЙМОНОВА,
омӯзгор аз шаҳри Ваҳдат