Надежда Антонова, варзишгари тоҷик дар Чемпионати Осиё миёни дӯстдорони бозии шоҳмот мақоми аввал ва медали зарринро касб кард.

Мусобиқаи мазкур аз 14-ум то 23-юми декабр дар шаҳри Ал-Айни Амороти муттаҳидаи араб баргузор гардида, шоҳмотбозон аз 31 кишвар дар он иштирок карданд. Надежда Антонова бо шикаст додани ҳамаи рақибони худ ба гирифтани медали тилло даст ёфт.

Қайд кардан ба маврид аст, ки Надежда дар ҳамин чемпионат, ҳамчунин, ба гирифтани нишони биринҷӣ дар риштаи шоҳмоти зудбозӣ (рапид) низ сазовор гардида буд.

Ҳамакнун, ин шоҳмотбози ботаҷрибаи кишвар, ки чанде пеш ғолиби мусобиқаи "Ҷоми Пешвои миллат" шуда буд, бо ду медали аз Чемпионати Осиё ба Ватан бармегардад.

Қобили зикр аст, ки дар ин Чемпионат, ҳамчунин, шоҳмотбози дигари тоҷик Сӯҳроб Ҳамдамов низ ба гирифтани медали тилло миёни шоҳмотбозони имконияташон маҳдуд даст ёфт.