Насли созандаву бунёдкори имрӯза ва ояндаро месазад, ки фарзонафарзандони миллати тоҷик, аз ҷумла Қаҳрамонони Тоҷикистонро ҳамчун идеали худ қарор дода, ҳаёту фаъолияти пурсамари онҳоро омӯхта, дар фаъолияти кории худ ҳамчун як падидаи нав истифода намоянд.

Яке аз фарзонафарзандони миллати тоҷик, ки имрӯз кулли тоҷикони ҷаҳон бо ин шахсияти беназири таърихӣ ифтихору сарфарозӣ доранд, ин Пешвои миллат муҳтарам Эмомалӣ Раҳмон мебошанд. Оид ба ҷоннисориву қаҳрамонӣ, соҳибмаърифатӣ, ҷасорату мардонагӣ ва аз ҳама муҳим инсондӯстиву меҳанпарастии ин шахсияти таърихӣ чи қадаре васф кунем, боз ҳам кам аст. Зеро натиҷаи донишу малакаи бузурги илмиву сиёсии муҳтарам Эмомалӣ Раҳмон натанҳо барои халқи тоҷик, балки барои тамоми ҷаҳон борҳо исбот гардидааст.

Пешвои миллат ҳам маорифпарваранду ҳам ятимпарвар ва ҳам инсонпарваранду ҳам ваҳдатофар. Пешвои миллати тоҷикон шахсияти нотакрор, қавиирода, дорои сифатҳои ҳамидаи инсонӣ, истеъдоди Худододи давлатдорӣ ва сулҳҷӯяндагиву созандагӣ буда, ба ваъдаи бо шири сафеди модар ва ҷони миллионҳо нафар халқи тоҷик то нафаси охирин содиқ хоҳад монд.
Таъмини шароити зиндагии арзанда ва инкишофи озодонаи ҳар як шахс самти афзалиятноки Ҳукумати мамлакат ба шумор меравад. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз рӯзҳои аввали ба сари ҳокимият омадан, пуштибон ва ғамхори ятимон, шахсони яккаву танҳо ва нафарони барҷомонда гардида, пайваста барои таъмини зиндагии онҳо чораҳои муассир меандешанд. Роҳбари оқилу хирадманди тоҷикон ҳамеша бо хислатҳои нодиру раиятпарварии хеш дар фикри беҳбудии шароити зиндагии мардуми эҳтиёҷманд, ятимон, барҷомондагон ва шахсони бесаробону камбизоат буда, таваҷҷуҳи махсус зоҳир кардан ба ин табақаи ниёзмандро аз аҳли ҷомеа талаб менамоянд. Ҳамин аст, ки пайваста таъкид менамоянд: “Ман ҳеҷ вақт ятими кулро дар нимароҳ намемонам, меомӯзонам, тарбия мекунам ва ба ҳаёти мустақилона гусел менамоям”.

Яке аз далелҳои возеҳи ин гуфтаҳо, ки дар авроқи таърихи миллат бо ҳарфҳои заррин сабт гардидааст, ин ба таълиму тарбия фаро гирифтан ва умуман ба воя расонидани ҳазорҳо кӯдакони ятиму бепарастори ҷанги таҳмилии мамлакат мебошад. Дар он вазъияти мушкили сиёсӣ дастгирӣ ва пуштибонӣ аз ятимону барҷомондагон на кори ҳар роҳбари давлат аст.

Бунёд гардидани Мактаб-интернатҳои нави президентӣ, хонаи пиронсолон ва дигар иншооти ба ин соҳа рабтдошта, аз ҷумлаи ташаббусҳо ва ибтикороти беназири Пешвои миллат муҳтарам Эмомалӣ Раҳмон мебошад.

Президенти кишвар зимни ҳар як сафари корӣ ба шаҳру ноҳияҳои мамлакат дар навбати аввал бо ятимону бепарасторон ва барҷомондагон мулоқоти судманд ороста, бо онҳо аз таҳти дил суҳбат мекунанд ва бо суханҳои гарму ширини инсондӯстонаву падарона дили ҳар ятимеро шоду масрур месозанд. Яке аз иқдомҳои бузурги дигаре, ки ба ин қишри ҷомеа равона гардидааст, ин пайдарҳам баланд бардоштани нафақаи маъюбон мебошад, ки ҳамасола аз 20 то 40% баланд бардошта мешавад.

Пешвои миллат ҳанӯз соли 2021 дар Паёмашон ба мақомоти олии қонунгузор ва намояндагӣ, ки 26 январи соли 2021 баргузор гардида буд, таъкид дошта буданд, ки: “Ҳукумати кишвар ба масъалаи ҳифзи саломатӣ ва нигоҳубини ятимону маъюбон ва пиронсолону бепарасторон мунтазам ғамхорӣ зоҳир карда, барои беҳтар сохтани шароити иҷтимоии онҳо тадбирҳои саривақтиро амалӣ менамояд”.

Ҳар як сухани Роҳбари давлат барои ятимону бепарасторон ин саҳифаи нави зиндагии онҳо мебошад. Зеро имрӯз нисбат ба ин қишри ҷомеа имкониятҳои зиёд дар тамоми самтҳо, аз ҷумла зимни таҳсили миёна, зимни имтиҳонсупорӣ дар Маркази миллии тестии назди Президенти Ҷумҳурии Тоҷикистон, зимни таҳсил дар мактаби олӣ, дар умум то ба мустақилият расидан, пайваста бо имкониятҳо фаро гирифта мешаванд.

Ҳукумати кишвар онҳоро ҳамчун ҷавонони ояндасози миллат арзёбӣ намуда, барои дар тамоми муассисаҳои таълимии кишвар ба омӯзиши илму дониш фаро гирифтани онҳо ва дар ин ҷода омода намудани мутахассисони касбӣ барои бахшҳои ҳаёти иқтисодиву иҷтимоӣ, фарҳангӣ ва сиёсӣ чораҳои муассир андешида истодааст.

Маҳз тавассути сиёсати хирадмандона ва бунёдкоронаи Роҳбари давлат муҳтарам Эмомалӣ Раҳмон сатҳи камбизоатӣ дар мамлакат сол то сол коҳиш ёфта, аз 83%-и соли 1999 ба 21% дар соли 2024 баробар гардидааст. Яке аз сабабҳои асосии коҳиш ёфтани сатҳи камбизоатӣ дар Тоҷикистон ин андешидани чораҳои дахлдор, аз ҷумла додани грантҳо ва ё қарзҳои бебозгашт, инчунин баланд бардоштани музди меҳнати хизматчиёни давлатӣ, нафақахӯрон, маъюбону бепарасторон ва ҳамзамон зиёд гардидани ҷойҳои нави корӣ дар мамлакат мебошад.

Шоҳзод РАҲИМЗОДА, мудири
шуъбаи ҷавонони Кумитаи
иҷроияи ҲХДТ дар
шаҳри Душанбе