ҶОМЕА
Ҷумъа 06 Декабр 2019 11:24
6644
Ба туфайли соҳибистиқлолии Ҷумҳурии Тоҷикистон ва таҳкими ваҳдату ягонагии миллат ҳоло дар Вилояти Мухтори Кӯҳистони Бадахшон корҳои созандагию бунёдкорӣ бомаром ҷараён дош-та, садҳо иншооти хурду бузург сохта мешаванд. Ҳамаи ин ташаббусҳои Ҳукумати мамлакат танҳо бо ҳадафи таъмини зиндагии шоистаи мардум, беҳтар шудани вазъи иҷтимоӣ – иқтисодии вилоят, баланд бардоштани некӯаҳволӣ ва беҳбудӣ бахшидан ба кору фаъолияти мақомоти маҳаллии ҳокимияти давлатии ВМКБ мебошанд.

Аммо мутаассифона, имрӯз баъзе шаҳрвандоне ҳастанд, ки чунин ободкориҳоро нодида мегиранд ва тариқи гурӯҳҳои шабакаҳои иҷтимоӣ аз қабили Фейсбук ва Одноклассники ахбороти бофтаю дур аз ҳақиқатро таблиғ мекунанд. Масалан, вақтҳои охир теъдоде аз сокиноне, ки дар хориҷа зиндагӣ доранд дар шабакаҳо мавзӯи “Чаро дар Хоруғ иншоотҳои муҳим сохта намешаванд?” – ро тезу тунд баррасӣ мекунанд. Ҳол он ки баъзеи онҳо ҳатто баъди соҳибистиқлолии кишвар боре ҳам ба маркази вилоят наомада, ҳар гуна шарҳу эзоҳро перомуни мавзӯъ паҳн мекунанд. Чунин ҳам мушоҳида мешавад, ки теъдоде аз ҳамватанон худро дар шабакаҳо бо ному тахаллусҳои номаълум муаррифӣ карда, бевосита ба мардумфиребӣ даст мезананд. Гурӯҳи дигаре аз волотирин арзишу қаноатмандии инсонӣ, яъне шукргузорӣ кардан аз ободонию созандагӣ дар кишвар ҳар гуна ҳазлу мазҳака эҷод мекунанд ва суоле ба миён меояд, ки магар ин рафтори онҳо аз рӯи ақлу фаросати одамӣ аст? Воқеан бузургон беҳуда нагуфтаанд, ки “Одами шукргузор агар ба мансабу мартаба расад, ободиҳо мекунад. Аммо носипос сӯзанда ҳасту ба ҳар мақоме даст ёбад, зулму ҷаҳолатро пеша намояд.”

Пас, инсоне ки ақлу заковат, фаҳмиши дуруст ва бою ғанӣ дорад, дар ободии Ватан пайваста саъю талош мекунад ва дар ин ҷода аз рӯи имокнияташ чизеро дареғ намедорад.

Бояд гуфт, ки феълан дар маркази вилоят иншоотҳои азиме, аз қабили сохтмони Театри миллӣ бунёд мегардад. Ин ишооти муҳими фарҳангӣ дар майдони 0,54 га бунёд гашта, то ин дам барои вусъати корҳои сохтмонии он 30 миллион сомонӣ аз тарафи Ҳукумати мамлакат ҷудо гардидааст. Аз ин маблағ 19 миллион сомонӣ ба соли 2019 рост меояд ва дар доираи маблағҳои ҷудогардида корҳои заминӣ, хобондани таҳкурсии оҳану бетонӣ, тахтасанги яклухти оҳану бетонӣ, чидани деворҳо аз хишт дар ошёнаи 1, 2 ва 3 иҷро шуда, ҳоло фермаҳои оҳанини он омода мегарданд.

Бинои Коллеҷи тиббии шаҳри Хоруғ дар маҳаллаи Хоруғи Боло воқеъ буда, ҳоло зиёда аз 60 фоиз корҳои сохтмонӣ дар он ба итмом расонида шудааст. Мувофиқи лоиҳа он аз 5 ошёна иборат буда, дар он тамоми имконоти зарурии таълим барои 240 донишҷӯ ва хобгоҳ барои 100 ҷой аз рӯи стандарти муосир фароҳам мегардад. Коллеҷи тиббӣ аз бинои таълимӣ, толори маҷлисӣ, ошхона, синфхонаҳои муҷаҳҳази фаннӣ, аз ҷумла барои дарсҳои амалӣ, аз синфхонаи таҷрибавӣ ва дигар утоқҳои зарурӣ иборат хоҳад буд. Ин муассисаи муосири тиббӣ бо харҷи 13 миллиону 700 ҳазор сомонӣ маблағҳои буҷети давлатӣ сохта мешавад.

Сохтмони бинои нӯҳошёнаи Донишгоҳи давлатии Хоруғ ба номи Моёншо Назаршоев ба маблағи умумии зиёда 60 миллион сомонӣ аз тарафи Дирексияи сохтмони иншооти ҳукуматии Дастгоҳи иҷроияи Президенти мамлакат дар маҳаллаи УПД босуръат идома дорад.

Инчунин бунёди 18 адад майдончаҳои варзишӣ бо маблағгузории ташкилотҳои бонуфузи ғайридавлатӣ ва дирексияи болозикр дар маҳаллаҳои Тирчиду Хуфак аз моҳи майи соли ҷорӣ то ҳозир давом ёфта, то 30 – солагии Истиқлолияти давлатӣ мавриди баҳрабардорӣ қарор мегиранд.

Баҳри коҳиш додани эҳтиёҷоти кормандони мақомоти ҳифзи ҳуқуқ ба манзили зист бо икдоми Ҳукумати Ҷумҳурии Тоҷикистон аз соли 2017 сохтмони ду бинои 12 - ошёна дар ҷамоати шаҳраки Шириншоҳ Шоҳтемури Хоруғ идома ёфта, то соли 2018 аллакай 7,5 миллион сомонӣ барои бунёди он аз худ гардидааст. Соли 2019 боз иловатан ду миллион сомонӣ ба иншооти мазкур ҷудо гашта, корҳои сохтмонӣ вусъати тоза пайдо карданд.

Ҳоло сохтмони бинои иловагии дуошёнаи кӯдакистони №1 барои 200 нафар дар ҷамоати болозикр идома дошта, он бо маблағгузории шуъбаи сохтмони асосии вилоят бунёд мегардад.

Дар Бозори 20 – солагии Истиқлолияти Хоруғ сохтмони як қатор иншооти хусусӣ аз қабили Маркази савдо, Ошхонаи миллӣ, мағозаҳои яклухтфурӯш ва ғайра босуръат давом дорад.

Бинои муассисаи таълимии МТМУ – и №8 шаҳри Хоруғ чанде қабл ба нақшаи азнавсозии маркази вилоят ворид гардида, соли 2019 барои оғози корҳои сохтмонии он аз тарафи Ҳукумати мамлакат 3 миллион сомонӣ ҷудо гардидааст. Муассиса барои 640 ҷойи нишаст пешбинӣ гардида, тарҳрезии лоиҳаи шабакаҳои берунаи он идома дорад.

Дар фарҷом гуфтаниам, ки набояд чунин ободиҳоро нодида гирему аз ҷумлаи одамони ношукр бошем. Барои қадр кардани корҳои созандагӣ нанг бояд дошт, зеро аҷдодонамон гуфтаанд:

Шукр гӯӣ, неъматат афзун шавад,
В-ар нагӯӣ, аз кафат берун шавад.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Декабр 2019 c.