Дар шаҳри Душанбе бахшида ба “Рӯзи Модар” мусобиқаи кушоди варзишӣ оид ба волейболи касбӣ ва ғайрикасбӣ байни бонувони вазорату идораҳо ва ташкилоту муассисаҳо баргузор мегардад.

Дар ин бора аз дафтари матбуоти раиси шаҳри Душанбе хабар доданд.

Бино ба иттилои манбаъ, барои баргузории мусобиқаи мазкур 13 феврал қарори вижаи раиси шаҳр ба тасвиб расидааст ва бонувони вазорату идораҳо барои дарёфти “Ҷоми раиси шаҳри Душанбе” байни ҳам рақобат хоҳанд кард.

Тавре дар қарор омадааст, мусобиқа бо мақсади дар сатҳи баланд таҷлил намудани “Рӯзи Модар” ва арҷгузорӣ ба мақому манзалати модарон ва дастгириву қадрдонии занону бонувон аз 15 феврал то 6 март гузаронида мешавад.

Гуфта мешавад, ки барои дар сатҳи баланд баргузор кардани ин мусобиқа аз ҳисоби маблағҳои фонди рушди пойтахт 140 ҳазору 750 сомонӣ ҷудо гардидааст.

Лозим ба ёдоварист, ки дар солҳои гузашта ҳам барои дарёфти “Ҷоми раиси шаҳри Душанбе” байни бонувони вазорату идораҳо чунин мусобиқа баргузор гаштааст.

Хуршед ХОВАРӢ, “ҶТ”