29-уми октябр бо ташаббуси Иттифоқи журналистони Тоҷикистон корвони иттилоотии журналистон дар ҳайати 35 нафар ба НБО “Роғун” сафар карданд.

Дар сафари мазкур журналистон аз радиову маҷалла, рӯзномаҳо ва телевизионҳои давлативу хусусии манотиқи гуногуни кишвар иштирок карда, аз рафти корҳо дар Неругоҳи барқии обии “Роғун” дидан намуданд.

Дар НБО “Роғун” иншоотҳое ҳастанд, ки бо баланд шудани сатҳи оби обанбор зери об мемонанд. Бинобар ин, мақсади сафарро низ Зиннатулло Исмоилзода, раиси Иттифоқи журналистони Тоҷикистон маҳз дар он зикр кард, ки журналистонро мебояд аз рафти корҳо дар неругоҳ дидан намуда, барои боқӣ мондан ҳамчун марҳилаҳои таърихии рафти корҳо дар “Роғун” бо навиштани маводу матлабҳои гуногун ва аксу наворҳои худ аз минтақаҳои мазкур ба наслҳои минбаъда онро ба ёдгор гузоранд.

Ин нуктаро худи масъулини НБО “Роғун” низ чунин қайд карданд:

“Он корҳое ки мо имрӯз карда истодаем, баъди 10 солаҳо мумкин аст зери об монад. Зеро ки ин иншоотҳо марҳилавӣ буда, дар ниҳояти кор танҳо қисмати поёнии сарбанд ва баромадгоҳҳои нақбҳои асосӣ боқӣ хоҳад монд. Баъд аз он ки неругоҳ пурра сохта мешавад, шояд пайдо шаванд нафароне, ки пурсанд “Садҳо километр нақб гуфта буданд, пас куҷо шуд он ҳама?” Дар ин маврид мо метавонем бо истифода аз бойгониҳое, ки дорем ба он нафарон нишон диҳем, ки барои бунёд шудани ин манбаи нур чи қадар корҳои зиёд ба анҷом расонида шуда ва тақдири он нақбҳо чи шуд”.

Дар рафти сафар журналистон низ бо роҳбарият ва маъмурини неругоҳ дар суҳбат шуда, барои боз ҳам дар сатҳи баландтар ва касбитар навиштани матлабҳои худ саволҳо дода, ба онҳо посухҳои мушаххас гирифтанд.

Ғайр аз ин, ҳамчунин рӯзи сафари журналистон ба “Роғун” рӯзи таърихи барои ин иншооти бузурги аср ва мардуми тоҷик маҳсуб меёфт. Зеро расо ҳашт сол пеш - рӯзи 29-уми октябри соли 2016 худи Пешвои миллат, Президенти кишвар савори булдозер гашта, бо пеш кардани сангу шағал дар муддати якуним соат маҷрои дарёи Вахшро баста, ба бунёди сарбанди неругоҳи мазкур оғоз бахшида буданд. Инак, бо гузаро шудани 8 сол ду агрегати ин неругоҳ ба фаъолият оғоз карда, корҳо дар неругоҳи мазкур бо маром идома дораду аллакай чанде аз иншооти марҳилавӣ дар неругоҳ зери об мондаанд.

Журналистон ҳарчанд дар мавриди ин нуктаҳо ба хуби огоҳ буданд, аммо боз аз наздик дидани рафти корҳо дар неругоҳ барояшон ҷолиб ва фоидаовар гардид. Иштирокчиён пас аз боздиди неругоҳ ҳамчунин аз “Озмоишгоҳи марказии сохтмонӣ дар неругоҳ” дидан карданд. Дар рафти боздид аз озмоишгоҳ ба масъулин саволҳо дода, ба онҳо ҷавобҳои дақиқи худро ҷӯё шуданд. Мувофиқи иттилои масъулин ин озмоишгоҳ яке аз озмоишгоҳҳои санҷиши масолеҳи сохтмони сатҳи баланд дар Осиёи Марказӣ маҳсуб меёбад, ки ҳама гуна масолеҳи лозимии сохтмонӣ дар озмоишгоҳи мазкур аз санҷиш гузаронида мешавад.

Пас аз боздиди озмоишгоҳу хӯроки нисфирӯзӣ журналистон барои сафар ба Душанбе омода шуданд.

Пеш аз сафар аз ҷониби роҳбарияти неругоҳ ба ҳар як журналист туҳфаи хотиравӣ – китоби “Роғун воқеият ва одамон” тақдим карда шуд.

Ҳошим РАҲМАТУЛЛОЕВ, “ҶТ”