Дар шаҳри Бохтар сохтмони беш аз 300 иншооти соҳаҳои гуногун ба нақша гирифта шудааст, ки дар соли 2018-ум 40 адади он мавриди баҳрабардорӣ қарор гирифтааст. 

Тибқи иттилои Валиҷон Ятимзода, мудири бахши меъморӣ ва шаҳрсозии шаҳр, дар соли 2019-ум бунёди 103 иншооти дигар дар назар буда, корҳои созандагиву бунёдкорӣ дар доираи омодагиҳо ба пешвози ҷашни 30-солагии Истиқлолияти давлатии Ҷумҳурии Тоҷикистон сурат мегиранд.

Гуфта мешавад, ки соли 2019 аз ҳисоби соҳибкори ватанӣ Фаррух Сатторов, бинои иловагии дорои 8 синфхона дар литсейи “Орионо” ва сохтмони бинои истиқоматии панҷошёна сохта мешавад. Инчунин аз тарафи ҶДММ “Сафаралиён” ва соҳибкор Умар Давлатов сохтмони майдончаи варзишӣ, ҳавзи шиноварӣ, майдончаи бозии кӯдакона ва бинои истиқоматии 12-ошёна дар маҳаллаи Борбад дар назар дошта шудааст.