Дар доираи таҷдиди шоҳроҳи байни пойтахти кишвар, шаҳри Душанбе ва маркази маъмурии вилояти Хатлон, шаҳри Бохтар пули нав ба дарозии 300 метр аз болои рӯди Вахш бунёд мегардад.

Айни замон пуле, ки дар болои рӯди Вахш устувор аст ва маркази вилоятро бо пойтахт мепайвандад, дар мавзеи шаҳраки Қизилқалъаи ноҳияи Хуросон ҷойгир буда, мероси даврони шӯравист. Пул чандин сол таҷдид шуда буд, лек айни ҳол чандон ҷавобгӯ ба меъёрҳои байналмилалӣ нест.

Ёдовар шудан бамаврид аст, ки шоҳроҳи байни шаҳрҳои Душанбе ва Бохтар 82 километр тӯл дошта, барои таҷдиди он дар се марҳила 186 млн. доллар маблағ сарф мешавад. Таҷдиди роҳ тирамоҳи соли пешин оғоз ёфта, соли 2023 онро пурра ба истифода медиҳанд. Пас аз таҷдид роҳ аз дараҷаи сеюм ба дараҷаи якум – “1-Б”, чун роҳи тезҳаракат барои нақлиёт табдил меёбад. Бунёди роҳро ширкати чинии “Синзян бейеин” ба уҳда дорад.