Дар ноҳияи Рӯшон бо иштироки Имомназар Хоҷаназар Лутфулло, раиси ноҳия, Раҳимзода Маҳмад Забир, директори Маркази миллии қонунгузории назди Президенти Ҷумҳурии Тоҷикистон, намояндагони сохторҳои қудратӣ, Бахши кор бо ҷавонон ва варзиш ва сокинони ноҳия чорабиниҳои идона баргузор гардид.

Ба иттилои Шӯҳрат Алиев, сармутахассиси Бахши кор бо ҷавонон ва варзиш, ба ҷуз аз чорабиниҳои фарҳангии ба ифтихори Рӯзи Истиқлолияти давлатии кишвар ва “Соли ҷавонон”, инчунин, мусобиқаҳои варзишӣ аз рӯи намуди шоҳмот, волейбол, тенниси рӯи миз ташкил ва гузаронида шуд.

Раҳимзода Маҳмад Забир қабл аз оғози чорабиниҳо оид ба тағйиру иловаҳо ба Қонуни Ҷумҳурии Тоҷикистон “Дар бораи танзиму анъана ва ҷашну маросимҳо дар Ҷумҳурии Тоҷикистон” ба ҳозирин маълумоти зарурӣ пешниҳод намуд.

Дар қисмати фарҳангӣ бошад, ҳунармандону санъаткорони ноҳия баҳри болидахотирии иштирокдорон барномаи ҷолиби фарҳангӣ пешкаш намуданд.

Дар мусобиқаҳои варзишӣ бошад, рақобатҳои омехтаи теннис, ки байни бонувон доир шуд, Суҳайло Нурҳаётова, хонандаи синфи 11–и МТМУ №9, ҷои аввал, Заринаи Мамадато зинаи дуюм ва Анисаи Ёғибек, хонандагони синфи 11–и ҳамин мактаб ҷои сеюмро ишғол намуданд.

Дар бозии волейболи мардона аз байни 8 даста тими “Шпад” ҷои 1, дастаи “Вомар” ҷои 2 ва тими “Деҳрушон” ҷои 3-ро гирифтанд.
Ғолибон аз ҷониби Бахш ва мақомоти иҷроияи маҳаллии ҳокимияти давлатӣ бо мукофотпулӣ қадрдонӣ шуданд.

Машҳур ИМОМНАЗАРОВ, “ҶТ”