19 сентябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ ба ноҳияи Данғара ташриф оварда, нахуст бо гузоштани санги асос ба корҳои сохтмони бинои Маркази ҷавонон дар ноҳия оғози расмӣ бахшиданд.

Дар ин бора аз Хадамоти матбоути Президенти кишвар иттилоъ дода, навиштаанд, ки барои сохтмони бинои 7 - ошёнаи марказ бо таҳхона, дар маркази ноҳия 18 садяк замин ҷудо гардидааст.

Зимни муаррифии лоиҳа ба Сарвари давлат иттилоъ доданд, ки дар ошёнаи якуми бинои нав толори маҷлисӣ бо 200 ҷойи нишаст, ошёнаи дуюм ҳуҷраҳои кории Маркази ҷавонон, бахши кор бо ҷавонон ва варзиш, иттифоқи ҷавонон ва як толори хурд барои суҳбату вохӯриҳо сохта мешавад.

Дар умум шумораи ҳуҷраҳои кории бинои сохташаванда 20 ададро ташкил менамояд, ки оянда дар онҳо шароити муосири корӣ фароҳам хоҳад омад.

Марказҳои омӯзишиву тайёрии касбӣ, омӯзиши забонҳои хориҷӣ, китобхона, гӯшаи варзишӣ дар ошёнаҳои аз 3 то 5 ва меҳмонхона бошад, дар ошёнаҳои 6-7 ҷой дода мешавад.

Иншооти мазкур дар доираи таваҷҷуҳу дастгирии ҳамаҷонибаи Ҳукумати Ҷумҳурии Тоҷикистон нисбат ба ҷавонон сохта шуда, дар он ба маҳфилҳои “Пайравони Пешвои миллат”, “Эҷодкорони ҷавон” ва ризокорон (волонтёрон) низ ҷой дода мешавад.

Қобили тазаккур аст, ки дар замони соҳибистиқлолӣ маҳз бо таваҷҷуҳу дастгирии Пешвои миллат муҳтарам Эмомалӣ Раҳмон дар 7 шаҳру ноҳияи вилояти Хатлон биноҳои марказҳои ҷавонон аз нав сохта шуда, бо шароити замонавӣ муҷаҳҳаз гардонида шудааст.