23 октябр дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон вобаста ба татбиқи Қарори Ҳукумати Ҷумҳурии Тоҷикистон аз 28 апрели соли 2023, таҳти рақами №169 “Дар бораи тартиб оид ба меъёрҳои миллии тарбияи ҷисмонӣ ва солимии аҳолӣ” семинар – машварати омӯзишӣ доир гардид.

Тавре аз маркази таҳлил ва иттилооти Кумита иттилоъ доданд, чорабинии мазкур таҳти раёсати Зулфиқор Гулаҳмадзода, раиси Кумитаи кор бо ҷавонон ва варзиш ва Баҳрулло Давлатзода, муовини якуми раиси Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон ҷараён гирифта, дар он масъулини вазорату идораҳо, мақомоти иҷроияи ҳокимияти давлатии ВМКБ, вилоятҳои Суғду Хатлон, шаҳри Душанбе, шаҳру ноҳияҳои тобеи ҷумҳурӣ, муассисаҳои таҳсилоти олии касбӣ ва миёнаи умумӣ ба таври ҳузуриву онлайнӣ (фосилавӣ) иштирок намуданд.

Раиси Кумита зимни сухани ифтитоҳии семинар – машварати омӯзишӣ иброз доштанд, ки қарори мазкур бо мақсади оммавигардонии соҳаи тарбияи ҷисмонӣ ва варзиш, солимӣ ва омодагии аҳолӣ ба меҳнат ва ҳифзи Ватан қабул гардида, ҳамасола шаҳрвандони аз синни 9 то 70 сола ва аз ин боло меъёрҳои миллии тарбияи ҷисмонӣ ва солимии аҳолиро дар асоси принсипҳои ҳатмӣ ва ихтиёрӣ иҷро менамоянд.

Гуфта шуд, ки принсипи ҳатмии иҷрои меъёрҳои миллӣ нисбати хонандагон ва донишҷӯёни муассисаҳои таҳсилоти миёнаи умумӣ ва олии касбӣ, кормандони мақомоти давлатӣ татбиқ гардида, дигар шаҳрвандони Ҷумҳурии Тоҷикистон дар асоси принсипи ихтиёрӣ меъёрҳои миллиро амалӣ месозанд.

Дар идомаи семинар – машварат Саидраҳмон Раҳмонов, директори Муассисаи давлатии “Маркази ҷумҳуриявии методӣ”-и Кумита баромад намуда, оид ба меъёрҳои миллии тарбияи ҷисмонӣ ва солимии аҳолӣ маълумоти муфассал пешниҳод карданд.