25-уми апрел дар майдони назди Муассисаи давлатии “Театри давлатии академии опера ва балети ба номи С. Айнӣ” ва дар дохили Муассисаи давлатии боғи “Куруши Кабир” таҳти унвони “Намудҳои миллии варзиш - рукни асосии фарҳанги миллӣ” Фестивали бозиҳои миллии варзишӣ доир гашт.

Ин чорабинӣ бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи ҷавонон ва 100 солагии пойтахи кишвар шаҳри Душанбе ташкил карда шуд.

Дар чорабинии мазкур Дилрабо Мансурӣ, муовини Сарвазири Ҷумҳурии Тоҷикистон, Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати кишвар, намояндагони вазорату идораҳо, ҷавонони фаъол, роҳбарону намояндагони корпусҳои дипломатӣ, устодону мураббиён ва донишҷӯёну варзишгарони муассисаҳои таълимӣ ва тайёрии варзишии ҷумҳуриявию шаҳрӣ иштирок намуданд.

Мақсад аз баргузории ин чорабиниро ҳайати тадорукот рушди бештари бозиҳои миллии варзишӣ ва эҳёи дигарбораи он миёни мардум дониста, қайд карданд, ки бо ин роҳ метавонем насли наврас ва ҷавонони кишварро дар руҳияи эҳтиром ва арҷгузорӣ ба таъриху анъанаҳои миллии аҷдодон раҳнамун сохта, ҳамзамон таҳкими тарзи ҳаёти солим, ҳисси худшиносиву худогоҳӣ, зиракии сиёсӣ ва пешгирии омилҳои номатлубро дар миёни ин қишри ҷомеа бештар созем.

Ҳамчунин Дилрабо Мансурӣ, муовини Сарвазири Ҷумҳурии Тоҷикистон низ дар оғози чорабинӣ суханронӣ намуда, ташкил ва баргузории фестивали мазкурро баҳри рушди бозиҳои миллӣ дар кишвар фоли нек хонд.

Дар фестивали мазкур зиёда аз 50 намуди бозиҳои миллии варзишӣ бо тарзу усули маҳаллӣ ба ҳозирин намоиш дода шуд.

Дар идомаи фестивал ҳамчунин барномаи фарҳангию фароғати пешкаши ҳозирин гардонида шуд, ки сарояндагони шинохтаи кишвар ва ансамблҳои рақсӣ бо ҳунари болои худ табъи иштирокчиёни чорабиниро болида гардониданд.

Ҳошим РАҲМАТУЛЛОЕВ, “ҶТ”