3-юми сентябр ба ифтихори таҷлили 33-солагии Истиқлоли давлатии Ҷумҳурии Тоҷикистон дар Қасри теннис ва маҷмааи варзиши обии шаҳри Душанбе мусобиқаи байналмилалӣ оид ба шиноварӣ оғоз гардид.

Дар ин бора сомонаи расмии телевизиони “Варзиш” иттилоъ дод.

Мувофиқи иттилои манбаъ дар маросими кушодашавии мусобиқаи мазкур Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Рамазон Раҳимзода, вазири корҳои дохилии Ҷумҳурии Тоҷикистон, ҳамзамон раиси Федератсияи миллии шиноварии Ҷумҳурии Тоҷикистон генерал-полковники милитсия, Рибиш Александр Сергеевич, сардори Раёсати кадрҳо ва кор бо ҳайати шахсии ВКД Ҷумҳурии Беларус, Яртсев Александр, муовини ШҶ “Динамо”-и ВКД Ҷумҳурии Беларус, Мустаев Руслан, ноиби Президенти Федератсияи миллии шиноварии Ҷумҳурии Узбекистон, Абдуллозода Муҳаммадшо, котиби генералии Кумитаи миллии олимпии Тоҷикистон, ректори Донишкадаи тарбияи ҷисмонии Тоҷикистон ба номи С.Раҳимов ва дигар шахсони расмӣ иштирок намуданд.

Мусобиқаи байналмилалӣ оид ба шиноварӣ бахшида ба ҷашни Истиқлоли давлатӣ чанд сол аст, ки дар Тоҷикистон баргузор мегардад. Дар мусобиқаи навбатӣ, ки ҳамакнун ҷараён дорад, бештар аз 100 варзишгар аз кишварҳои Қазоқистон, Узбекистон, Белорус, Афғонистон, Федератсияи Русия ва Тоҷикистон номнавис шуда, тайи се рӯз барои касби зинаҳои ифтихорӣ байни ҳам рақобат менамоянд.

Аз миёни онҳо 40 нафар дастпарварони мактабҳои шиноварии шаҳри Душанбе ва минтақаҳои дигари кишвар буда, баҳри баланд бардоштани касбияти худ ва ба даст овардани зинаҳои ифтихорӣ рақобат хоҳанд кард.