МУАЛЛИФ: ҲАСАН АЗИЗОВ

Худоёрзода Ходоёр Завқибек, вазири нақлиёти Тоҷикистон, 30-юми январ зимни нишасти матбуотӣ зикр кард, ки соли сипаришуда дар доираи лоиҳаҳои сармоягузорӣ 98,5 километр роҳи автомобилгард, 18 пул, 40,7 километр хати роҳи оҳан, 3,7 километр нақб сохта ба истифода дода шуд.

Аз ҷумла, азнавсозии роҳи автомобилгарди Восеъ-Ховалинг ба масофаи 88 километр бо 12 пул, 45 қубур ва дигар иншоот ба маблағи зиёда аз 340 миллион сомонӣ, таъмини асосии 10,5 километр роҳи мошингарди Рашт-Навобод ва як пул аз болои дарёи Сорбоғ ба маблағи 23 миллион, сохтмони роҳи оҳани Душанбе-Қурғонтеппа (қисмати Ваҳдат-Ёвон) бо дарозии 40,7 километр бо 3 нақб бо дарозии 3,7 километр ва 5 пул бо маблағи 985 миллион сомонӣ мавриди истифода қарор гирифтанд.

Вазир қайд намуд, ки соли гузашта таъмири 533,1 километр роҳ бо маблағи 17 миллиону 896,2 ҳазор сомонӣ, аз ҷумла таъмири асосии 138,7 километр роҳ ба маблағи 13 миллиону 804 ҳазор сомонӣ ва шағалпушкунии 394,4 километр роҳ ба маблағи 4 миллиону 92,2 ҳазор сомонӣ иҷро шудааст. Инчунин, таъмири ҷории 6086,5 километр роҳ бо маблағи 7 миллиону 774 ҳазор сомонӣ, таъмир пулҳо 219 адад бо дарозии 4838 метр ба маблағи 8158 ҳазор сомонӣ ва таъмири 256 адад қубур бо дарозии 1988 метр бо маблағи 563,3 ҳазор сомонӣ иҷро гардидаанд.

- Дар натиҷаи офатҳои табиӣ дар соли 2016 503 километр роҳҳои автомобилгард ба маблағи 16,4 миллион сомонӣ, 67 купрӯк ба маблағи 24,1 миллион сомонӣ ва 5 қубур бо маблағи 16,3 ҳазор сомонӣ зарар дидаанд, - афзуд Х. Худоёрзода.