Бахшида ба 20-солагии Рӯзи Ваҳдати миллӣ дар Муассисаи давлатии “Академияи ВАО-и Тоҷикистон” бо иштироки рӯзноманигорони собиқадор ва устодону донишҷӯёни донишгоҳҳои кишвар ҳамоиш баргузор гардид.

Дар ҷамъомати мазкур рӯзноманигороне, ки шоҳиди бевоситаи раванди барқароршавии сулҳ ва ризоияти миллӣ дар Тоҷикистон буданд, ба насли ҷавон доир ба ин рӯйдоди муҳим қисса намуданд.

Зинатулло Исмоилзода, директори Академияи ВАО зимни баргузории ҳамоиш қайд кард, ки барои ба даст омадани Ваҳдати миллӣ ва ба ҳам овардани мардуми тоҷик нафарони ватандӯсти кишвар ҷоннисориҳои зиёд кардаанд: “Дар раванди ба ваҳдату ягонагӣ расидани миллати тоҷик ва ба Ватан баргардонидани гурезаҳо нақши рӯзноманигорон низ назаррас аст. Аз ҷумла барномаҳои таҳиянамудаи кормандони “Радиои Тоҷикистон” он замон пайвандгар миёни мардуми гуреза бо Ватан буд”.

Журналистони тоҷик Шералӣ Мустафоқулов, Сураёёи Шуҷоат, Сафаралӣ Нозимов ва коргардони собиқадор Баҳром Сайфиддинов аз таърихи барномаҳои маъруфи радиоиву телевизионии “Хоки Ватан”, “Во ғариб” ва “Аз блокноти журналист” ва нақши муҳими онҳо дар истиқрори сулҳ дар кишвар қисса намуданд.

Дар охир рӯзноманигорони собиқадор барои саҳми арзанда гузоштан дар журналистикаи миллӣ ва ба муносибати 20-солагии Рӯзи Ваҳдати миллӣ бо ифтихорномаи Иттифоқи журналистони Тоҷикистон сарфароз гардонида шуданд.

Хуршед МАВЛОН, “ҶТ”