Аз тарафи мақомоти иҷроияи ҳокимияти давлатии шаҳри Душанбе бо мақсади дар сатҳи баланди ташкилӣ, фарҳангиву маърифатӣ ва ғоявию бадеӣ таҷлил намудани Рӯзи байналмилалии ҳифзи кӯдакон нақшаи чорабиниҳо таҳияву тасдиқ гардид.
 
Бино ба иттилои маркази матбуоти шаҳрдорӣ мутобиқи нақшаи мазкур рӯзи 1 июн дар шаҳри Душанбе барномаи идонаи фарҳангию фароғатӣ, ташкили намоиши ҳунару эҷод, мусаввараҳои беҳтарин ва дигар дастовардҳои кӯдакону наврасони пойтахт, ҳамчунин намоишҳои театрикунонидашуда ва ҳар гуна маъракаҳои хайриявӣ баргузор мегарданд. 

Ҳамчунин бо мақсади дастгирӣ ва ҳифзи иҷтимоии кӯдакони маъюбу бепарастор дар ин рӯз барои тарбиятгирандагони мактаб-интернатҳо ва хонаи кӯдакони шаҳри Душанбе дастархони идона ороста, барномаҳои ҷолибу рангини фарҳангӣ-фароғатӣ пешниҳод хоҳад шуд. 

Ёдовар мешавем, аввалин маротиба 1 июни соли 1950 Рӯзи байналмилалии кӯдакон ҷашн гирифта шуда, имрӯз онро дар тамоми кишварҳо қайд месозанд.